უფლებადამცველი ლევან ჩიტაძე, 2011 წლის 26 მაისს აქციაზე დაღუპული პოლიციელის, ვლადიმერ მასურაშვილის ოჯახს ხელახალი გამოძიების დაწყების შემთხვევაში თანამშრომლობისკენ მოუწოდებს.

„მე კიდევ ერთხელ ვუსამძიმრებ მასურაშვილის ოჯახს და მოვუწოდებ, რომ კარგი იქნება თუ დაინტერესდებიან და ხელს შეუწყობენ ხელახალ გამოძიებას“ - განაცხადა ჩიტაძემ.

მისივე თქმით, არ დასტურდება იმ პირთა ბრალეულობა, ვინც მასურაშვილის გარდაცვალებასთან დაკავშირებით ციხეში სხედან.

„ალექსანდრე ბიბილურის ბრალი, რომელიც ეჭვმიტანილი იყო მასურაშვილის მკვლელობაში, არ დადასტურდა. ჩვენ უამრავი ვიდეომასალა ვიხილეთ, თითქოს ბიბილურმა ავტომობილით გაიტანა მასურაშვილი და მისი სიცოცხლე იმსხვერპლა. ეს იყო ხელისუფლების ვერსია, რაც საბოლოოდ არ ადასტურდა. ბიბილურზე რამდენიმე საათის განმავლობაში ხორციელდებოდა ზეწოლა, რომ დაეწერა აღიარებითი ჩვენება, სადაც იტყოდა, რომ მანქანას ანზორ ბიწაძე მართავდა. მოგვიანებით როდესაც ვერ შეძლეს ბიბილურისთვის აღიარებითი ჩვენების დაწერინება, გეგმა შეცვალეს და უკვე უბრძანეს დაეწერა რომ მან ბიწაძის ბრძანებით გადაუარა პოლიციის თანამშრომელს. ბიბილურს უთხრეს, რომ თუ ის არ აღიარებდა დანაშაულს, სამუდამო პატიმრობას მისცემდნენ“- განაცხადა ლევან ჩიტაძემ.