საქართველოს მთავარი პროკურატურა, პარლამენტარ პაატა ლეჟავას დასაკითხად დაბარებასთან დაკავშირებით განცხადებას ავრცელებს.
პაატა ლეჟავა, მიმდინარე წლის 23 სექტემბერს, ვანში მომხდარ ინცინდენტთან დაკავშირებით მოწმის სახითაა დაბარებული.

„2012 წლის 11 დეკემბერს, იმერეთის, რაჭა-ლეჩხუმისა და ქვემო სვანეთის სამხარეო მთავარ სამმართველოში მოწმის სახით დასაკითხად დაბარებულია საქართველოს პარლამენტის წევრი, ვანის რაიონის მაჟორიტარი დეპუტატი ერთიანი ნაციონალური მოძრაობიდან პაატა ლეჟავა.

მისი დაკითხვაზე დაბარება უკავშირდება ამავე სამმართველოს წარმოებაში არსებულ სისხლის სამართლის საქმეს ვანის მუნიციპალიტეტის საკრებულოს თავმჯდომარის დავით კაკაბაძის და ნაციონალური მოძრაობის აქტივისტის (ამჟამად მაჟორიტარი დეპუტატის ვანის ოფისის ხელმძღვანელის) მამუკა ლეჟავას მიმართ.

გამოძიებით დადგენილია, რომ 2012 წლის 23 სექტემბერს, ქ. ვანში, ნაციონალური მოძრაობის ვანის ოფისის შენობაში სხვა პირებთან ერთად სცემეს, ჩაუმტვრიეს ნეკნი და მიაყენეს ჯანმრთელობის ნაკლებად მძიმე დაზიანება ბიზნესმენ მამუკა შარაშენიძეს, რადგან ამ უკანასკნელმა საჯაროდ გამოთქვა კრიტიკული და მწვავე შეფასებები ციხის ცნობილ სკანდალურ ვიდეოკადრებთან დაკავშირებით.
როგორც გამოძიების მასალებით ირკვევა, დასახელებული ინციდენტის დროს შემთხვევის ადგილზე იმყოფებოდა დეპუტატი პაატა ლეჟავაც, ხოლო დაზარალებულ მამუკა შარაშენიძის ჩვენებით კი, სწორედ ამ უკანასკნელმა მიიყვანა იგი პარტიული ოფისის შენობაში და შემდგომ ხელმძღვანელობდა მის ცემას“ - ნათქვამია პროკურატურის განცხადებაში.