საქართველოს პროკურატურამ თბილისის საქალაქო სასამართლოს მის წარმოებაში არსებული დავით ბეგიაშვილის საქმის შეწყვეტის შუამდგომლობით მიმართა. პროკურატურისვე შუამდგომლობითვე, შეწყდა სისხლისსამართლებრივი დევნა მის მიმართ, და გაუქმდა აღკვეთის ღონისძიება - პატიმრობა. ასევე, ყადაღა მოეხსნა დავით ბეგიაშვილის ქონებას.
ამის შესახებ ინფორმაციას საქართველოს მთავარი პროკურატურა ავრცელებს.
დავით ბეგიაშვილს ბრალი ედებოდა საქართველოს სისხლის სამართლის კოდექსის 180-ე მუხლის მე-2 ნაწილის ,,ა“ და ამავე მუხლის მე-3 ნაწილის ,,ბ“ ქვეპუნქტით გათვალისწინებული დანაშულის ჩადენაში. კერძოდ, ქ.თბილისში, ჭავჭავაძისგამზ. N44-ში მდებარე სახელმწიფოს კუთვნილი უძრავი ქონების თაღლითური გზით მართლსაწინააღმდეგოდ დაუფლებაში.
„სასამართლო გამოძიების ეტაპზე დაკითხულმა მოწმეებმა თავიანთ ჩვენებაში ვერ მიუთითეს ვერცერთ ფაქტობრივ გარემოებაზე, რომელიც დაარწმუნებდა, როგორც სახელმწიფო ბრალდებას, ისე სასამართლოს დავით ბეგიაშვილის მიერ წინასწარი შეთანხმებით ჯგუფის მიერ მოტყუებით, სხვისი დიდი ოდენობით ნივთის დაუფლების ჩადენაში. მოწმეებმა მხოლოდ დაადასტურეს ის გარემოება, რომ ჭავჭავაძის გამზირი N44-ში მდებარე ფართი წარმოადგენდა დავით ბეგიაშვილის საკუთრებას, თუმცა რა ფორმით, რა ხერხით, ან რა პროცედურების გავლით მოხდა აღნიშნული ქონების დავით ბეგიაშვილის საკუთრებაში გადასვლა მოწმეების მიერ დადასტურებული ვერ იქნა. ზემოაღნიშნულიდან გამომდინარე, ბრალდების მხარემ მიიჩნია, რომ მტკიცებულებების ერთობლივი, ობიექტური და სრულყოფილი გამოკვლევის შედეგად გონივრულ ეჭვს მიღმა ვერ დადასტურდა დავით ბეგიაშვილის მიერ საქართველოს სისხლის სამართლის კოდექსის 180-ე მუხლის მე-2 ნაწილის ,,ა“ და ამავე მუხლის მე-3 ნაწილის ,,ბ“ ქვეპუნქტით გათვალისწინებული დანაშაულის ჩადენა“ - ნათქვამია პროკურატურის მიერ გავრცელებულ განცხადებაში.
სასამართლომ პროკურატურის შუამდგომლობა სისხლის სამართლებრივი დევნის შეწყვეტის შესახებ - დააკმაყოფილა.