თბილისის საქალაქო სასამართლომ ბრალდებული გიორგი მასხარაშვილი, წარდგენილ ბრალდებაში გაამართლა და სხდომის დარბაზიდან გაათავისუფლა. გიორგი მასხარაშვილს ბრალად მკვლელობის მცდელობა ედებოდა.

სასამართლოს პრესსამსახურის ინფორმაციით, საქმე ეხება 2011 წლის 31 დეკემბერს საახალწლო წვეულებაზე ახალგაზრდებს შორის მომხდარ ინციდენტს, რა დროსაც ნასვამ მდგომარეობაში მყოფებმა, ურთიერთშელაპარაკებისას ერთმანეთს სიტყვიერი და ფიზიკური შეურაცხყოფა მიაყენეს, კერძოდ ბრალდებულმა გულ-მკერდის არეში დანის გამოყენებით დაჭრა გ.ა. მასხარაშვილის ქმედება აღკვეთილ იქნა წვეულებაზე მყოფი პირების მიერ, რის შემდეგაც ეს უკანასკნელი შემთხვევის ადგილიდან მიიმალა.
ღია სასამართლო სხდომაზე ბრალდებულმა თავი არ სცნო დამნაშავედ და მისთვის კანონით მინიჭებული დუმილის უფლება გამოიყენა.

„საქმის არსებითად განხილვისას, სხდომაზე გამოკვლეული მტკიცებულებებიდან გამომდინარე, მოსამართლემ მიიჩნია, რომ არ არსებობდა პირის დამნაშავედ ცნობისათვის საჭირო ერთმანეთთან შეთანხმებული, აშკარა და დამაჯერებელ მტკიცებულებათა ერთობლიობა, რაც დაადასტურებდა პირის ბრალეულობას შერაცხულ დანაშაულში. ბრალდების მხარემ ვერ წარმოადგინა გონივრულ ეჭვს მიღმა არსებული, შეთანხმებულ მტკიცებულებათა ერთობლიობა გიორგი მასხარაშვილის დამნაშავედ ცნობისა და მის მიმართ გამამტყუნებელი განაჩენის გამოტანისათვის“ - ნათქვამია სასამართლოს პრესსამსახურის მიერ გავრცელებულ განცხადებაში.

თბილისის საქალაქო სასამართლომ, საქმეზე შეკრებილი მასალების განხილვის შედეგად, ბრალდებული უდანაშაულოდ მიიჩნია და ის სასამართლოს სხდომის დარბაზიდან გაათავისუფლა.