აჭარის პრობაციის ბიუროსა და ამერიკული არასამთავრობო ორგანიზაცია PH-International-ის ორგანიზებით, ბათუმში აღრიცხვაზე მყოფმა 11-მა არასრულწლოვანმა პირობით მსჯავრდებულმა, ფსიქო-სარეაბილიტაციო პროგრამა გაიარა.
სასჯელაღსრულების სამინისტროს პრესსამსახურის ცნობით, პროექტში მონაწილე არასრულწლოვნებთან სამუშაო პროგრამა, პრობაციის ბიუროს სოციალური მუშაკის მიერ შედგენილი ბიო-ფსიქო-სოციალური შეფასების საფუძველზე, ინდივიდუალურად დაიგეგმა.
ორთვიანი პროგრამა, როგორც ჯგუფურ სესიებს, ისე ინდივიდუალურ სეანსებს მოიცავდა. გამოცდილი ფსიქოლოგები მოზარდებს აგრესიის მართვის, კონფლიქტების პრევენციის, დანაშაულის გენეზისისა და მისგან გამოწვეული ზიანის გაცნობიერების საკითხებზე ესაუბრებოდნენ.
კანონთან კონფლიქტში მყოფ არასრულწლოვანთა ფსიქო-სარეაბილიტაციო პროექტი იანვრიდან განახლდება და მასში აჭარის პრობაციის ბიუროში აღრიცხვაზე მყოფი სხვა არასრულწლოვნებიც ჩაერთვებიან.
პრობაციის რეგიონალური ბიუროები პირობით მსჯავრდებულთა რესოციალიზაციის მიზნით, მჭიდროდ თანამშრომლობენ არასამთავრობო სექტორთან.