საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს წარმომადგენლები, დღეს სამოქალაქო ჯანდაცვის წამყვანი კლინიკების პროფესიონალებთან ერთად, სასჯელაღსრულების #5 დაწესებულებაში ქალ მსჯავრდებულთა ჯანმრთელობის მდგომარეობას საჭიროებებს შეისწავლიან.

სამინისტროს პრე-სამსახურის ინფორმაციით, ვინაიდან, მთლიანად სასჯელაღსრულების სისტემაში პატიმართა დიდი უმრავლესობა მამაკაცია, სასჯელაღსრულების ჯანდაცვის სისტემაც უფრო მეტად მამაკაცთა საჭიროებებზეა მორგებული, რაც ქალებს არათანაბარ პირობებში აყენებს.

სამინისტროს ინფორმაციითვე, ონკოლოგიის ეროვნული ცენტრის, კანისა და ვენერიულ სნეულებათა ეროვნული ცენტრის, კარდიოლოგიური კლინიკა „გული“-ს, დავით ტატიშვილის კლინიკის, კლინიკა „ნევროლოგი“-ს, კლინიკა „ტესტი“-ს და მრავალპროფილიანი კლინიკა „მედლაბი“-ს ექიმები ქალ მსჯავრდებულებს სამედიცინო გამოკვლევებს ჩაუტარებენ და საჭიროების შემთხვევაში სათანადო მკურნალობას დაუნიშნავენ.

ქალი მსჯავრდებულები მთელს მსოფლიოში განსაკუთრებით მოწყვლად ჯგუფად არის მიჩნეული და მათ დაავადებათა პრევენციის, მონიტორინგის და მკურნალობის მხრივ განსაკუთრებული ყურადღება ესაჭიროებათ.

#5 დაწესებულებაში 956 ქალი იმყოფება. აქედან 56 მიუსჯელი და 900 მისჯილი პატიმარია.