ახმედ ჩატაევის გირაოს სანაცვლოდ სასამართლოს დარბაზიდან გათავისუფლების შესახებ საქალაქო სასამართლო განცხადებას ავრცელებს, რომელსაც „ნიუსპრესი“ უცვლელად გთავაზობთ:

„2012 წლის 6 დეკემბერს, თბილისის საქალაქო სასამართლომ დააკმაყოფილა ბრალდების მხარის შუამდგომლობა ბრალდებულ დავიდ მაიერის (ახმედ ჩატაევის) მიმართ აღკვეთის ღონისძიების გირაოთი შეცვლის თაობაზე და მას აღკვეთის ღონისძიება პატიმრობა შეეცვალა ნაკლებად მკაცრი აღკვეთის ღონისძიებით - გირაო 5 ათასი ლარის ოდენობით. ბრალდებული გათავისუფლდა სასამართლო სხდომის დარბაზიდან.
დავიდ მაიერს ბრალად ედებოდა საბრძოლო მასალის მართლსაწინააღმდეგო შეძენა, შენახვა და ტარება.
აღკვეთი ღონისძიების შეცვლის არგუმენტად ბრალდების მხარემ მიუთითა საქართველოს მთავარ პროკურატურაში მიმდინარე გამოძიება დავიდ მაიერის ბრალდების სისხლის სამართლის საქმეზე მტკიცებულებათა ფალსიფიკაციისა და სამსახურეობრივი უფლებამოსილების გადამეტების ფაქტებზე, რაზეც შემაჯამებელი გადაწყვეტილება მიღებული არ არის.
აღკვეთის ღონისძიების საკითხის განხილვისას სასამართლომ მიიჩნია, რომ შუამდგომლობაში მითითებული გარემოებები წარმოადგენს ახალ არსებით გარემოებებს, რის საფუძველზეც, სასამართლომ მიიღო გადაწყვეტილება დავიდ მაიერის მიმართ შეფარდებული აღკვეთის ღონისძიება - პატიმრობა, შეიცვალოს ნაკლებად მკაცრი აღკვეთის ღონისძიებით. სასამართლომ, ასევე მხედველობაში მიიღო საქმის გარემოებები, ბრალდებულის ოჯახური მდგომარეობა და მხარეთა განმარტებები.
გარდა ამისა, ვინაიდან დავიდ მაიერი არის უცხო ქვეყნის მოქალაქე, აქვს კონტაქტები საქართველოს საზღვრებს გარეთ, მის მიმართ აღკვეთის ღონისძიებასთან ერთად გამოყენებულ იქნა ვალდებულება, რომლის საფუძველზეც, ბრალდებულს საქმეზე საბოლოო გადაწყვეტილების მიღებამდე, ეკრძალება საქართველოს ტერიტორიის დატოვება“ - ნათქვამია სასამართლოს მიერ გავრცელებულ განცხადებაში.
საქმის არსებითად განხილვის მომდევნო სხდომა 2012 წლის 19 დეკემბერს, 15 საათზე გაიმართება.