საგარეჯოს მიმდებარე ტერიტორიაზე, თბილისი-ბაკურციხე-ლაგოდეხის საავტომობილო გზაზე ავტოსაგზაო შემთხვევა მოხდა.

შინაგან საქმეთა სამინისტროს მონაცემებით, ბაკურციხიდან თბილისის მიმართულებით მოძრავი „პრადოს" მარკის ავტომანქანა, საპირისპიროდ მოძრავ სამგზავრო მიკროავტობუსს შეეჯახა.

წინასწარი ინფორმაციით, ავტოსაგზაო შემთხვევის მიზეზი „პრადოს" მძღოლის არასწორი მანევრი გახდა.

შეჯახების შედეგად, ორი მოქალაქე შემთხვევის ადგილზე გარდაიცვალა, ხოლო ექვსი დაშავებული საგარეჯოს რაიონულ საავადმყოფოში მოათავსეს. კრიტიკულია მიკროავტობუსის მძღოლის ჯანმრთელობის მდგომარეობა.

საქმე საქართველოს სისხლის სამართლის კოდექსის 276-ე მუხლის მე-7 ნაწილით, „ავტოსაგზაო შემთხვევის შედეგად ორი ან მეტი პირის გარდაცვალების ფაქტზე"-აღიძრა, რაც ბრალის დამტკიცების შემთხვევაში 10 წლით თავისუფლების აღკვეთას ითვალისწინებს. გამოძიებას შსს საპატრულო პოლიციის დეპარტამენტის კახეთის სამმართველო აწარმოებს.