საქართველოს იუსტიციის მინისტრი თეა წულუკიანი, ზურაბ ჟვანიას საქმის გამოძიებასთან დაკავშირებით ინფორმაციის გახმაურებისგან, გამოძიების ინტერესებიდან გამომდინარე თავს იკავებს.
„მე ამ ეტაპზე ერთადერთი რამ შემიძლია ვთქვა და კარგი იქნება თუ ამას ყველა გაგებით მოვეკიდებით, როგორი გაგებითაც მსგავს შემთხვევებს ყველა დემოკრატიულ ქვეყანაში ეკიდებიან. როდესაც მიმდინარეიობს განმოძიება, იმ ორგანოს ხელმძღვანელი, ან ხელმძღვანელები, სადაც გამოძიება მიმდინარეობს, ღიად, უბრალოდ ვერ ლაპარაკობენ იმაზე, თუ რა ნაბიჯებია კონკრეტულად გადადგმული. წინააღმდეგ შემთხვევაში გამოძიების ინტერესები ზიანდება და გამოძიება აზრს კარგავს. ერთადერთი, რაც შემიძლია გითხრათ, არის ის, რომ ჟვანიას საქმე იყო, არის და იქნება ჩვენთვის ერთ-ერთი ყველაზე მაღალი პრიორიტეტი, რადგან ჩვენს ქვეყანას ეკუთვნის, რომ იცოდეს თუ რა პირობებში დაიღუპა მისი პრემიერ-მინისტრი, რომლისადმიც საზოგადოება მოწიწებითაა განმსჭვალული“ - აცხადებს წულუკიანი.

მისივე თქმით, ამ საქმეზე სიმართლის დადგენის მიზნით, ყველა რესურსი იქნება გამოყენებული.

წულუკიანი აცხადებს აგრეთვე, რომ განახლებული გამოძიების პროცესში მონაწილეობას გარდაცვლილის ოჯახიც მიიღებს.