სტრასბურგის სასამართლოში საქართველოდან 700 დასაბუთებული საქმეა შესული.

ამის შესახებ იუსტიციის მინისტრმა თეა წულუკიანმა ჟურნალისტებთან შეხვედრისას განაცხადა.

მისი თქმით, ბოლო დღეებში მის მიერ სტრასბურგში განხორციელებული ვიზიტის ერთ-ერთი ძირითადი მიზანი, სტრასბურგში გასაჩივრებულ საქმეთა რაოდენობის შემცირება იყო და აგრეთვე ის, რომ საქართველოში დამკვიდრდეს კულტურა, რათა ადამიანის უფლებების დაცვა ხდებოდეს საქართველოს სასამართლოების მიერ და მოქალაქეებს არ უწევდეთ საზღვარგარეთ სიარული იმისთვის რომ საკუთარი სიმართლე ამტკიცონ.

„სტრასბურგის სასამართლოს აქვს 700 ქართული დასაბუთებული საქმე. დაახლოებით ამდენივე საქმეა შესული, რომელიც პირველი შეხედვით დასაბუთებული არ არის. ეს ძალიან დიდი რაოდენობაა. მაგალითად საფრანგეთს, რომელიც ჩვენზე გაცილებით დიდი ქვეყანაა, სულ 60 დასაბუთებული საქმე აქვს. სტრასბურგის სასამართლო ჩვენს შეთავაზებას, განსახილველი საქმეების შემცირების შესახებ ძალიან პოზიტიურად შეხვდა. იმ 700 დასაბუთებულ საქმეზე, როგორც კი მათ შესახებ სტრასბურგის სასამართლო შეგვატყობინებს, იუსტიციის სამინისტრო დაიწყებს ინდივიდუალურ მოლაპარაკებებს მომჩივან მხარესთან საქმის მორიგებით დასრულების შესახებ “ - განაცხადა წულუკიანმა.

მისივე თქმით, რაც შეეხება საქმეებს, რომლებიც ჯერჯერობით სტრასბურგში გასაჩივრებული არ არის, სამინისტრო ეცდება ისინი სტრასბურგში წასვლამდე მოაგვაროს.

„მინდა ვუთხრა ყველა მომჩივანს და მათ შორის იმ 700-მდე ადამიანს, რომლებსაც სარჩელი აქვთ სტრასბურგის სასამართლოში შეტანილი, თუ მიაჩნიათ, რომ ხელისუფლების ცვლილების შემდეგ არის შანსი იმისა, რომ მათი საქმე ქვეყნის შიგნით მოგვარდეს, ჩვენ მზად ვართ, მათი კონკრეტული საკითხი ადამიანის უფლებებთან დაკავშირებით უფრო მოკლე ვადაში მოვაგვაროთ, ვიდრე ეს სტრასბურგში მოხერხდება“ - განაცხადა მინისტრმა.