საქართველოს შინაგან საქმეთა სამინისტრო, „თბილისის წყლის“ ყოფილი გენერალური დირექტორისა და კომპანია „ენ სი სი“ -ს დირექტორის გიორგი ქელბაქიანისა და ამავე კომპანიის ფინანსური მენეჯერის არჩილ ჩოგოვაძის დაკავებასთან დაკავშირებით მტკიცებულებებს აქვეყნებს.

„გამოძიების მიერ მოპოვებული მტკიცებულებებით ირკვევა, რომ 2009 – 2012 წლებში კომპანია „ენ სი სი“ სამშენებლო სამუშაოებს თბილისის მთავრობის დაკვეთით ექსკლუზიურად ასრულებდა. ამ წლებში დაკვეთების საერთო ღირებულებამ 200 მილიონ ლარამდე შეადგინა. დედაქალაქის საბიუჯეტო სახსრებიდან გაცემული თანხების განკარგვას კომპანია „ენ-სი-სი“ სხვადასხვა კორუფციული სქემებით ახორციელებდა. ერთ-ერთ ასეთი სქემა ერთ კონკრეტულ საქმეზე გამოძიების მიერ უკვე გამოვლენილია. კერძოდ, გიორგი ქელბაქიანის პირადი კომპიუტერის დათვალიერების შედეგად აღმოჩნდა, რომ „ენ სი სი“ - ს ფინანსური დირექტორი არჩილ ჩოგოვაძე გიორგი ქელბაქიანს ელექტრონული ფოსტით უგზავნიდა ცხრილებს, სადაც ნათლად ჩანს თუ რა რაოდენობის თანხებს ურიცხავდნენ 2009-2012 წლებში ფიზიკური პირს გოჩა დარსაძეს სამშენებლო სამუშაოებისათვის. აუდიტორების მიერ შედგენილი შუალედური ცნობის თანახმად, ლეპტოპის დათვალიერების შედეგად მოპოვებულ ინფორმაციასა და საბანკო ამონაწერებს შორის აღმოჩნდა რადიკალური განსხვავებები.
ფაქტიურად, შპს „ენ სი სი“-ს მიერ 2009-2012 წლებში გოჩა დარსაძისათვის და მისივე კონტროლის ქვეშ მყოფი შპს ,,გვირაბგამყვანი“-სათვის კონტრაქტის გარეშე სულ ჩარიცხულია 6 589 925 ლარი, საიდანაც შპს „ენ სი სი“ - ს დირექტორმა გიორგი ქელბაქიანმა და ფინანსურმა დირექტორმა არჩილ ჩოგოვაძემ ე.წ. „ატკატი“-ს სახით უკან დაიბრუნეს 2 535 546 ლარი“ - ნათქვამია სამინისტროს მიერ გამოქვეყნებულ მტკიცებულებაში.

გარდა აღნიშნული ფაქტებისა, შინაგან საქმეთა სამინისტროს პრესსამსახურის უფროსის, ნინო გიორგობიანის განცხადებით, კომპანია „ენ სი სი“ არ იხდიდა გადასახადებს და საგადასახადო სამსახურს ნულოვან დეკლარაციას აბარებდა.