ადამიანის უფლებათა ცენტრი ლოპოტას ხეობაში ჩატარებული სპეცოპერაციის შედეგად დაკავებული ჩეჩენი ლტოლვილის, ახმედ ჩატაევის დაუყოვნებლივ გათავისუფლებას მოითხოვს.

როგორც „ნიუსპრესს“ ადამიანის უფლებათა ცენტრიდან აცნობეს, ისინი ახმედ ჩატაევს უდანაშაულოდ მიიჩნევენ. მათივე ინფორმაციით, ცენტრმა ჩატაევისთვის აღმკვეთი ღონოსძიების - წინასწარი პატიმრობის შეცვლა მოითხოვა. თბილისის საქალაქო სასამართლოში მიმდინარე პროცესზე კი, პროკურატურა არ დათანხმდა ადვოკატების შუამდგომლობას, ჩატაევის გირაოთი გამოშვების შესახებ, რის შემდეგაც სასამართლომ ჩატაევი ისევ წინასწარ პატიმრობაში დატოვა.

ადამიანის უფლებათა ცენტრი ასევე მოითხოვს, მთავარმა პროკურატურამ დროულად მოახდინოს რეაგირება განცხადებაზე, სადაც წერია, რომ ბრალდება მთლიანად მოწმეების, კერძოდ - მესაზღვრეების გიორგი კერესელიძის, ბადრი ტყელამაძისა და გოგი აივაზაშვილის ცრუ ჩვენებებზეა დამყარებული.

ახმედ ჩატაევი სასჯელაღსრულების გლდანის მე–18 სამკურნალო დაწესებულებაშია მოთავსებული. დაკავების შემდეგ მას მარცხენა ფეხი მოკვეთეს.

აღნიშნულ თემასთან დაკავშირებით, ადამიანის უფლებათა ცენტრი ხვალ სპეციალურ პრესკონფერენციას გამართავს.