პარტია „დემოკრატიული მოძრაობა ერთიანი საქართველოს“ ლიდერი ნინო ბურჯანაძე, ხელისუფლებას მოუწოდებს მაქსიმალურად მოკლე დროში მოხდეს პოლიტპატიმრებად აღიარებული პირების საქმეების გადახედვა და მათი გათავისუფლება.
როგორც დღეს გამართულ ბრიფინგზე ნინო ბურჯანაძემ განაცხადა, ძალიან დიდია იმ ადამიანთა რიცხვი, რომლებსაც თავისუფლება უკანონოდ აქვთ აღკვეთილი ან განდევნილი არიან საკუთარი სამშობლოდან.
„მე დღეს ციხიდან უკვე სამმა პატიმარმა დამირეკა, იმის იმედით, რომ ჩემგან მოისმენდნენ კონკრეტულ თარიღს, თუ როდის გადაწყდება მათი საკითხი. ვიცი, რომ დღეს ძალიან ბევრი ადამიანი აქტიურად არის დაკავებული ამ პრობლემის მოგვარებით და ადამიანის უფლებათა კომიტეტთან შექმნილია სპეციალური კომისია, რომელიც სწავლობს ამ საკითხს. მინდა, როგორც ქალბატონ ეკა ბესელიას, ასევე ყველა იმ ადამიანს, რომელიც აქტიურად მუშაობს ამ კომისიაში მადლობა გადავუხადო . ისინი ცდილობენ, რომ ეს საკითხი რაც შეიძლება სწრაფად მოგვარდეს. თუმცა, ამავდროულად, არ შემიძლია არ გამოვხატო შეშფოთება იმასთან დაკავშირებით, რომ მიუხედავად ყველაფრისა, პროცესი ჭიანურდება და ჩვენ ჯერ კიდევ არ ვიცით რამდენად სწრაფად დასრულდება ის“ - განაცხადა დემოკრატიული მოძრაობის ლიდერმა.
მისივე თქმით, „სჯობს დამნაშავე იყოს გარეთ, ვიდრე თუნდაც ერთი უდანაშაულო ადამიანი ციხეში. კიდე ერთხელ მინდა მივმართო ყველა იმ ადამიანს, ვინც პოლიტპატიმრების საკითხებით არის დაკავებული, რომ ეს პატიმრები არიან მართლაც ძალიან ღირსეული პიროვნებები. ადამიანები რომლებიც არ შეეგუენ ქვეყანაში არსებულ უსამართლობას, ჩვენი სამშობლოს განადგურებას და ნგრევას. ამ ადამიანებმა თავდაუზოგავად იბრძოლეს უსამართლო რეჟიმის წინააღმდეგ და ისინი ნამდვილად იმსახურებენ იმას რომ ახალი ხელისუფლების პირობებში, ძალიან სწრაფად დაუბრუნდნენ თავიანთ ოჯახებს და დაუბრუნდნენ ნორმალური ცხოვრების წესს“ - განაცხადა ნინო ბურჯანაძემ.