სააპელაციო სასამართლო ორგანიზაცია „მწვანე ალტერნატივას“ სარჩელის განხილვას, რომელიც საქალაქო სასამართლოს 2012 წლის 31 მაისს გადაწყვეტილების გაუქმებას ითხოვს, ხვალ განაახლებს.

გადაწყვეტილებით, არასათავრობო ორგანიზაციას უარი ეთქვა გარემოს დაცვის სამინისტროს წინააღმდეგ შეტანილი სარჩელის დაკმაყოფილებაზე.

როგორც „ნიუსპრესს“ „მწვანე ალტერნატივადან“ აცნობეს, საქმე ეხება „გარემოს დაცვის მინისტრის მიერ კანონის უხეში დარღვევით გამოცემულ ბრძანებას, რომლითაც მდინარე თერგზე „დარიალი ჰესის“ მშენებლობაზე დადებითი ეკოლოგიური ექსპერტიზის დასკვნა გაიცა. გარემოს დაცვის სამინიტრომ არ უზრუნველყო „მწვანე ალტერნატივას“ ჩართვა ჰესის მშენებლობის პროექტზე ეკოლოგიური ექსპერტიზის დასკვნის გაცემის შესახებ გადაწყვეტილების მიღების პროცესში. გასაჩივრებული ბრძანების თანახმად,
გარემოს დაცვის სამინისტრომ დადებითი ეკოლოგიური ექსპერტიზის დასკვნა გასცა პროექტზე,რომელიც ითვალისწინებდა ჰესის მშენებლობისათვის ყაზბეგის ეროვნული პარკის ფარგლებში არსებული ტერიტორიის (2.64 ჰა) გამოყენებას“ - ნატქვამია ორგანიზაციის მიერ გავრცელებულ ინფორმაციაში.

მათივე ინფორმაციით, „დარიალი ჰესის“ პროექტი ითვალისწინებს 11 კილომეტრიანი ხეობის დაახლოებით 8 კმ სიგრძის მონაკვეთზე მდინარე თერგის წყლის 90 პროცენტის სადერივაციო მილში, ხოლო შემდეგ სადერივაციო გვირაბში გადაგდებას. „ამგვარად განხორციელებული პროექტი რადიკალურად შეცვლის ხეობის ლანდშაფტს და გამოიწვევს მისი ისტორიულად ჩამოყალიბებული კულტურულ-ეთნოგრაფიული და ტურისტული ფასეულობის დაკარგვას. პროექტს ექნება შეუქცევადი ზეგავლენა მდინარეზე დამოკიდებულ სახეობებზე, მათ შორის, წითელ ნუსხაში შეტანილ ნაკადულის კალმახზე და გამოიწვევს თერგში ამ პოპულაციის გაქრობას“ - მიიჩნევენ ორგანიზაციაში.

დარიალის ხეობაში, მდინარე თერგზე, საქართველო-რუსეთის საზღვართან ახლოს, 110 მეგავატიანი „დარიალი ჰესის“ მშენებლობა 2011 წლის სექტემბერში კომპანია „დარიალ
ენერჯიმ“ დაიწყო. მშენებლობა 2014 წლის 19 მაისს უნდა დასრულდეს. პროექტი საქართველოს მთავრობასა და „დარიალ ენერჯის“ შორის 2011 წლის 19 მაისს დადებული ხელშეკრულების საფუძველზე ხორციელდება.