საქართველოს ახალგაზრდა იურისტთა ასოციაციამ, კვლევის - „სისხლის სამართლის მართლმსაჯულებაში არსებული ხარვეზები და რეკომენდაციები“ პრეზენტაცია გამართა.

არასამთავრობო ორგანიზაციის პრესსამსახურის ცნობით, საიამ კვლევაში შეაფასა, როგორც საკანონმდებლო გარემო, ისე განვითარებული პრაქტიკა, რის შედეგადაც ნათლად გამოვლინდა, რომ ახალ საპროცესო კოდექსს არ შეუცვლია სისხლის სამართლის მართლმსაჯულებაში არსებული გარემო. კვლავ არსებობს მნიშვნელოვანი ხარვეზები, როგორც კანონში, ისე პრაქტიკაში.

„ახალგაზრდა იურისტთა ასოციაციის“ კვლევის თანახმად, დანაშაულის გამოვლენისა და გამოძიების მარეგულირებელი ნორმები ჩამორჩება ადამიანის უფლებათა ევროპულ სტანდარტებს და აზიანებს ინდივიდის ინტერესებს. ასევე, პირის უფლების შემზღუდავი საგამოძიებო მოქმედებების ჩატარებისა და აღკვეთის ღონისძიების შეფარდების პრაქტიკა იმავე პრობლემებს შეიცავს, რაც არსებობდა ძველი 2010 წლამდე არსებული საპროცესო კოდექსის მოქმედებისას. საია მიიჩნევს აგრეთვე, რომ ნაფიც მსაჯულთა სასამართლოს ინსტიტუტი შეიცავს ნაფიცი მსაჯულის მიუკერძოებლობის დაცვის არასაკმარის მექანიზმებს. ასევე, ვერდიქტი არ პასუხობს თანამედროვე ევროპულ სტანდარტს.

პრეზენტაციაზე, საიამ ადამიანის უფლებათა ევროპულ სტანდარტებზე დაყრდნობით კონკრეტული რეკომენდაციები წარმოადგინა.

შეხვედრას ესწრებოდნენ ამ სფეროში მომუშავე ადგილობრივი და საერთაშორისო ორგანიზაციები, ქვეყნის საკანონმდებლო, აღმასრულებელი და სასამართლო ხელისუფლების წარმომამდგენლები.