იუსტიციის სამინისტროს ინიციატივით, დღეს სასტუმრო „რედისონში“ საკანონმდებლო ცვლილებათა ორი პაკეტის პროექტის პრეზენტაცია გაიმართა.

ღონისძიებას საქართველოს საკანონმდებლო, აღმასრულებელი და სასამართლო ხელისუფლების წევრები, ქვეყანაში აკრედიტებული საერთაშორისო მისიების ხელმძღვანელები, იურიდიულ საკითხებზე მომუშავე ქართული და უცხოური არასამთავრობო ორგანიზაციების წარმომადგენლები ესწრებოდნენ.

“ეს არის საკანონმდებლო ინიციატივების პირველი წყება, რომელიც შევა პარლამენტში, ცვლილებები ეხება იუსტიციის საბჭოს დაკომპლექტების წესს, იუსტიციის უმაღლესი სკოლის ფუნქციონირებას, ჩვენ სერიოზული ცვლილებების შეტანას ვთავაზობთ პარლამენტს მოსამართლეთა დისციპლინური დევნის მექანიზმებში, რათა სასამართლო სისტემის შიგნით აღარ არსებობდეს დაუსჯელობის სინდრომი.

მნიშვნელოვანი ინიციატივებია აგრეთვე საქართველოს სისხლის სამართლისა და სისხლის სამართლის საპროცესო კოდექსებთან დაკავშირებით, რაც სასჯელთა უპირობო შეკრების წესის ცვლილებას, მკაცრი სასჯელის მიერ ნაკლებად მკაცრი სასჯელის შთანთქმის პრინციპის ამოქმედებას ითვალისწინებს...

ჩვენ გვინდა, საზოგადოების რაც შეიძლება ფართო ნაწილი იყოს ჩაბმული ამ ცვლილებების პროექტის განხილვაში, მოვისმინოთ თქვენი წინადადებები, მოსაზრებები, შენიშვნები“ - განაცხადა თ. წულუკიანმა.
იუსტიციის სამინისტროს ცნობით, ცვლილებებისა და დამატებების შეტანა სამ უმნიშვნელოვანეს კანონში იგეგმება. ესენია - ორგანული კანონი „საერთო სასამართლოების შესახებ“, კანონი „საქართველოს საერთო სასამართლოების მოსამართლეთა დისციპლინური პასუხისმგებლობისა და დისციპლინური სამართალწარმოების შესახებ“, კანონი „იუსტიციის უმაღლესი სკოლის შესახებ“. ამ კანონპროექტების მიღების შემთხვევაში შეიცვლება საქართველოს იუსტიციის საბჭოს დაკომპლექტების წესი და გაუქმდება პრეზიდენტის უფლება დანიშნოს ორი წევრი იუსტიციის უმაღლეს საბჭოში;