საქართველოს ადვოკატთა ასოციაცია „საზოგადოებრივ მაუწყებელში“ საგადასახადო სამსახურის შესვლასთან დაკავშირებით განცხადებას ავრცელებს.

ასოციაციის თავმჯდომარე ზაზა ხატიაშვილი აღშფოთებას გამოთქვამს ამ ფაქტის გამო და მას არხზე განხორციელებულ ზეწოლად აფასებს.

“აღშფოთებული ვარ საგადასახადო სამსახურის მიერ საზოგადოებრივი მაუწყებლის შემოწმებით. ეს არის პირდაპირი ზეწოლა არხის დამოუკიდებლობაზე და მიუკერძოებლობაზე. აღნიშნული წარმოადგენს ასევე გაფრთხილებას სხვა ტელევიზიების მიმართ, რომ მათაც იგივე ემუქრებათ თუ არ იქნებიან მორჩილები. მე პირადად რამდენჯერმე მქონდა პრეტენზიები და მკაცრი განცხადებები საზოგადოებრივი მაუწყებლის მიმართ, ვინაიდან ეს იყო სააკაშვილის ჯიბის ტელევიზია და იგნორირებას უკეთებდა ადვოკატთა ასოციაციას, მაგრამ მე, როგორც ადვოკატთა ასოციაციის თავმჯდომარე, ვერ შევეგუები იმავე მეთოდებს რა მეთოდებითაც მოქმედებდა სააკაშვილის რეჟიმი“- აცხადებს ხატიაშვილი.

ადვოკატთა ასოციაციის თავმჯდომარე ხელისუფლებას პრესის თავისუფლების დაცვისკენ მოუწოდებს და მოითხოვს დაუყონებლივ გამოიყვანოს საგადასახადო სამსახურის კონტროლიორები „საზოგადოებრივი მაუწყებლიდან“.

“მე მინდა შევახსენო ხელისუფლებას, რომ ევროპის ადამიანის უფლებათა დაცვის კონვენციის მე-10 მუხლის თანახმად, სახელმწიფოს ეკისრება პოზიტიური ვალდებულებაა დაიცვას პრესის თავისუფლება. მე, ადვოკატთა ასოციაციის თავმჯდომარე ზაზა ხატიაშვილი, საზოგადოებრივ მაუწყებელში „ხადურის“ სპეც–ჯგუფის შესვლას ვაფასებ როგორც ადამიანის უფლებათა დაცვის კონვენციის მე-10 მუხლის დარღვევად. მოვუწოდებ ხელისუფლებას მოეგოს გონს და სასწრაფოდ გაიყვანოს საზოგადოებრივი მაუწყებლიდან კონტროლიორები“-აცხადებს ხატიაშვილი.

„საზოგადოებრივ მაუწყებელში“ საგადასახადო სამსახურის წარმომადგენლები ფინანსთა მინისტრის ნოდარ ხადურის ბრძანების საფუძველზე შევიდნენ.

სამინისტროს განცხადებით, „საზოგადოებრივ მაუწყებელში“ შემოსავლების სამსახურის შესვლა არხის მაღალ რისკფაქტორთა ჯგუფში მოხვედრის გამო გახდა აუცილებელი