„უფლებადამცველი გაერთიანება“ საქალაქო სასამართლოს თავმჯდომარეს მამია ფხაკაძეს მანდატურების უკანონოდ გატავისუფლებაში ადანაშაულებს.

ორგანიზაციის განცხადებით, ფხაკაძემ განსხვავებული პოლიტიკური შეხედულებებისა და 5 ნოემბერს ტელეკომპანია ,,კავკასიის’’ პირდაპირ ეთერში მისი და სხვა ხელმძღვანელი პირების კანონსაწინააღმდეგო ქმედებებზე საუბრის გამო, სასამართლოს შვიდი მანდატური სამსახურიდან გაათავისუფლა.

როგორც „უფლებადამცველი გაერთიანებისა“ და გათავისუფლებული მანდატურების ერთობლივ პრესკონფერენციაზე განაცხადეს, ვინაიდან თბილისის საქალაქო სასამართლოში განსხვავებული პოლიტიკური შეხედულებების მქონე ადამიანები 1 ოქტომბრის შემდეგაც განიცდიდნენ შევიწროებას, სიტყვიერ შეურაცყოფას და მუქარას ხელმძღვანელობის მხრიდან მათ კოლექტიური წერილით მიმართეს სასამართლოს თავმჯდომარეს მამია ფხაკაძეს. წერილში აღნიშნული იყო, რომ პოლიტიკური და სიტყვიერი შეურაცხყოფის გამო, ისინი პროტესტის ნიშნად ტოვებდნენ სამსახურს და ეს არ ყოფილა განცხადება თანამდებობიდან გათავისუფლების შესახებ. პრესკონფერენციაზე აღინიშნა, რომ ეს იყო მიმართვა, რათა თავმჯდომარეს სასამართლოში სიტუაცია გამოესწორებინა.

„თუმცაღა მამია ფხაკაძემ ეს სამსახურიდან განთავისუფლების განცხადებად შეაფასა და მას შემდეგ რაც მის მიმართ ,,კავკასიის’’ პირდაპირ ეთერშიც გაჟღერდა ბრალდებები მანდატურების მხრიდან, ყველა მათგანი იმავე საღამოს გაათავისუფლა“ - აღნიშნეს პრესკონფერენციაზე.

„მამია ფხაკაძის გადაწყვეტილება წინააღმდეგობაში მოდის საჯარო სამსახურის შესახებ კანონის 95-ე მუხლთან, ვინაიდან ფხაკაძეს თუკი თანამშრომლების გათავისუფლება სურდა, მას ინდივიდუალური განცხადებები უნდა დაეკმაყოფილებინა და არა კოლექტიური. ამასთან კოლექტიურ განცხადებაშიც არსად წერია, რომ თანამშრომლები გათავისუფლებას ითხოვდნენ ან სამსახურიდან საბოლოოდ წასვლას გეგმავდნენ. ფხაკაძის გადაწყვეტილება ,,უფლებადამცველთა გაერთიანების’’ მხრიდან სასამართლოში აუცილებლად გასაჩივრდება“ - განაცხადა ,,უფლებადამცველთა გაერთიანების’’ თავმჯდომარემ ნიკოლოზ მჟავანაძემ.