სააპელაციო სასამართლომ არასამთავრობო ორგანიზაცია „მწვანე ალტერნატივას“ საჩივრის საფუძველზე დანიშნული პროცესი, რომელიც დღეს უნდა გამართულიყო, 2012 წლის 7 ნოემბრისთვის გადადო.

როგორც „ნიუსპრესს“ „მწვანე ალტერნატივადან“ აცნობეს, პროცესზე სასამართლოს უნდა განეხილა, თუ რამდენად კანონიერია საქალაქო სასამართლოს 2012 წლის 31 მაისის გადაწყვეტილება, რომლითაც „მწვანე ალტერნატივას“ უარი ეთქვა გარემოს დაცვის სამინისტროს წინააღმდეგ შეტანილი სარჩელის დაკმაყოფილებაზე.

„მწვანე ალტერნატივა” საქალაქო სასამართლოს გარემოს დაცვის მინისტრის იმ ბრძანების გაუქმებას სთხოვდა, რომლითაც დარიალის ჰესის მშენებლობაზე დადებითი ეკოლოგიური ექსპერტიზის დასკვნა გაიცა.

ორგანიზაციაში აცხადებენ, რომ სააპელაციო სასამართლოს სხდომა გარემოს დაცვის სამინისტროს წარმომადგენლის თხოვნით გადავადდა.

„მწვანე ალტერნატივას“ ინფორმაციით, 2011 წლის სექტემბერში დარიალის ხეობაში, მდინარე თერგზე, საქართველო-რუსეთის საზღვართან ახლოს დაიწყო 110 მეგავატიანი სიმძლავრის დარიალის ჰიდროელექტროსადგურის მშენებლობა.

პროექტი ითვალისწინებს დაახლოებით 8 კმ სიგრძის მონაკვეთზე მდინარის წყლის უდიდესი ნაკადის - 90%-ის მოქცევას თავდაპირველად, სადერივაციო მილსადენში და შემდეგ კი - სადერივაციო გვირაბში.

ორგანიზაციაში აცხადებენ, რომ, სულ 11 კმ სიგრძის დარიალის ხეობის 8 კმ-იან მონაკვეთზე რადიკალურად შეიცვლება ლანდშაფტი და ხეობა ისტორიულად ჩამოყალიბებულ კულტურულ-ეთნოგრაფიულ და ტურისტულ ფასეულობას დაკარგავს, პროექტს ექნება შეუქცევადი ზეგავლენა მდინარეზე დამოკიდებულ სახეობებზე, მათ შორის, წითელ ნუსხაში შეტანილ ნაკადულის კალმახზე და გამოიწვევს თერგში ამ პოპულაციის გაქრობას.