საქართველოს ახალგაზრდა იურისტთა ასოციაციის მედიის სამართლებრივი დაცვის ცენტრი საზოგადოებრივ მაუწყებელსა და ტელეკომპანია „პიკს“ შორის დისკუსიებში მონაწილეობისთვის მზადყოფნას გამოთქვამს.

საია-ს მედიის სამართლებრივი დაცვის ცენტრი ტელეკომპანია „პიკის“ გარშემო განვითარებულ მოვლენებს ეხმაურება და აღნიშნავს, რომ დღეისთვის „პიკის“ ჟურნალისტები ვერ ახორციელებენ პროფესიულ საქმიანობას. ტელეკომპანიის კუთვნილ სიხშირეზე გადის მათ მიერ წინა პერიოდში მომზადებული მასალა. დაინტერესებულ საზოგადოებას კი არ აქვს შესაძლებლობა მიიღოს მიმდინარე პროცესების თაობაზე განახლებული ინფორმაცია „პიკის“ მეშვეობით.

ამასთან, საია-ს მედიის სამართლებრივი დაცვის ცენტრი აღნიშნავს, რომ 2012 წლის 13 იანვარს სსიპ საზოგადოებრივი მაუწყებლისა და შპს ტელეკომპანია „პიკს“ შორის გაფორმებული სახელმწიფო შესყიდვების შესახებ ხელშეკრულება #3-1-ის თანახმად, „პიკი“ ვალდებულია საზოგადოებრივი მაუწყებლის მესამე არხი (პირველი კავკასიური) უზრუნველყოს რუსულენოვანი ტელეპროდუქციით.

საზოგადოებრივი მაუწყებლის პოზიციით, 2012 წლის 13 ოქტომბერს პირდაპირ ეთერში გამოხატული მდუმარე პროტესტით, ასევე სატელევიზიო სიგნალის სატელიტზე აწევით ტელეკომპანია „პიკ“-მა უხეშად დაარღვია ხელშეკრულება.

საია-ს ცნობით, ირკვევა, რომ აღნიშნულის თაობაზე სსიპ საზოგადოებრივი მაუწყებლის გენერალურმა დირექტორმა 16 ოქტომბერს აცნობა „პიკის“ ხელმძღვანელობას. ამავე დროს „პიკის“ გენერალური დირექტორის ალექსანდრე ფარულავას კორესპონდენციით დგინდება, რომ სწორედ ტელეკომპანია „პიკის“ მოთხოვნით შეჩერდა სახელშეკრულებო ურთიერთობა მხარეებს შორის.

საია-ს მედიის სამართლებრივ დაცვის ცენტრში მიაჩნიათ, რომ აღნიშნულ საკითხზე გამოქვეყნებული დოკუმენტები ძალიან ბევრ კითხვას აჩენს, როგორც საზოგადოებრივი მაუწყებლის, ისე ტელეკომპანია „პიკის“ ხელმძღვანელობის მიმართ.

ორგანიზაციის ცნობით, გაურკვევლობის ფონზე იქმნება საშიშროება, რომ საზოგადოებრივი მაუწყებელი ვერ შეძლებს საქართველოს კანონმდებლობით მასზე დაკისრებული ვალდებულებების განხორციელებას. კერძოდ, „მაუწყებლობის შესახებ“ საქართველოს კანონის მე-16 მუხლის „ზ“ და „თ“ პუნქტების თანახმად, საზოგადოებრივი მაუწყებელი ვალდებულია ეთერის არანაკლებ 25%-ისა დაუთმოს დამოუკიდებელი კერძო სამართლის იურიდიული პირების მიერ მომზადებულ პროგრამებს, რომელთა შესყიდვა განხორციელდება „სახელმწიფო შესყიდვების შესახებ“ და „მაუწყებლობის შესახებ“ საქართველოს კანონებით დადგენილი წესით. ამავე დროს, პროგრამებში უნდა ასახოს საზოგადოებაში არსებული ეთნიკური, კულტურული, ენობრივი, რელიგიური, ასაკობრივი და გენდერული მრავალფეროვნება.

საია-ს განმარტებით, გასათვალისწინებელია ისიც, ტომ „პიკსა“ და საზოგადოებრივ მაუწყებელს შორის ურთიერთობის გამწვავება უკავშირდება ფინანსურ საკითხებსაც, რითაც აუდიტის სამსახური უნდა დაინტერესედეს.

„მაღალი საზოგადოებრივი ინტერესიდან გამომდინარე, მნიშვნელოვნად მიგვაჩნია სახელმწიფო აუდიტის სამსახური დაინტერესდეს მხარეთა მიერ სახელმწიფო ფინანსების ხარჯვის მიზანშეწონილობით. ამავე დროს სსიპ საზოგადოებრივმა მაუწყებელმა, ასევე, ტელეკომპანია „პიკის“ ხელმძღვანელობამ მეტი სიცხადე უნდა შეიტანონ რუსულენოვანი არხის თაობაზე წარმოქმნილ გაუგებრობაში“ - აცხადებენ ორგანიზაციაში და აღნიშნავენ, რომ აუცილებელია, მხარეებმა მაუწყებლობის შეფერხების გარეშე მოაგვარონ ურთიერთობები, იმგვარად, რომ არ მოხდეს მაყურებლებისა და ჟურნალისტთა უფლებების დარღვევა.

ტელეკომპანია „პიკის“ საქმიანობა 2012 წლის 12 ოქტომბრიდან შეფერხდა.