ყოფილი ბიზნესმენი კომპანია „მაქსტოპის“ ყოფილი მფლობელი, სისხლის სამართლებრივ დევნაში მყოფი მინდია ქაშიბაძე, ფინანსური პოლიციისა და კუდ-ის მარალჩინოსნებისა და ყოფილი ვიცე-სპიკერის მიხეილ მაჭავარიანის წინააღმდეგ სისხლის სამართლის საქმის აღძვრას მოითხოვს.

ქაშიბაძისთვის ბიზნესის წართმევის საკითხთან დაკავშირებით, დღეს ადვოკატმა დიმიტრი გაბუნიამ პრესკონფერენცია გამართა, რომლის დროს „სკაიპით“ ჩეხეთის ციხიდან თავად მინდია ქაშიბაძე ჩაერთო.

როგორც ქაშიბაძემ აღნიშნა, „ნაციონალური მოძრაობის“ ანგარიშზე თანხების გადარიცხვის მიზნით, 2005 წლიდან მასზე ფინანსური პოლიციის ჩინოვნიკების მხრიდან შეტევა დაიწყო. კერძოდ, მისი თქმით, ეს მოთხოვნა დაშინებაში, მუქარასა და ფიზიკურ ზეოწლაში გადაიზარდა.

ქაშიბაძემ დაასახელა კუდ-ის მაღალჩინოსანი გია დგებუაძე მეტსახელად „მასტერა“, ფინანსური პოლიციის თანამშრომელი ლევან ფხალაძე, ფინანსური პოლიციის ერთ-ერთი სამმართველოს უფროსი ირაკლი კირკიტაძე, რომლიც ქვემო ქართლის გუბერნატორის დავით კირკიტაძის ძმაა და მიხეილ მაჭავარიანი - წინა პარლამენტის ვიცე-სპიკერი, რომელიც ქაშიბაძის თქმით, მისი ერთ-ერთი ყოფილი მეწილის ბიზნესმენ ავთანდილ (ჭუტა) წერეთლის ნათესავია და ქაშიბაძისათვის ქონების ჩამორთმევის პროცესში მონაწილეობდა.

როგორც მან აღნიშნა, ის სასტიკად სცემეს ავთანდილ წერეთლის კაბინეტში და გაურკვეველი ვალის - 650 ათასი აშშ დოლარის დაბრუნებას მოითხოვდნენ.

ამასთან, ყოფილი ბიზნესმენი ასახელებს შევარდნაძის მთავრობის ენერგეტიკის მინისტრს თემურ გიორგაძეს, რომელიც ასევე მონაწილეობდა მისი ქონების წართმევის პროცესში. დღეისთვის კომპანია „მაქსტოპის“ 50-50%-ის მფლობელები სწორედ წერეთელი და გიორგაძე არიან.

გაბუნიას თქმით, მაჭავარიანი დაინტერესებული იყო მისი ბიზნესით, რათა კონკურენცია გაეწია კომპიუტერული კომპანია „ალტასთვის“, რომელიც სხვადასხვა ინფორმაციით, ერთ-ერთ ყოფილ და ახლანდელ დეპუტატს ეკუთვნის.

როგორც ადვოკატმა განაცხადა, მისი დაცვის ქვეშ მყოფი დაახლოებით ორი წელია ჩეხეთის ციხეში იმყოფება. საქმის მასალების შესწავლის შემდეგ, ჩეხეთის საკონსტიტუციო სასამართლომ დაკავებულის საქართველოში ექსტრადიციაზე უარი განაცხადა, იმ მოტივით, რომ საქართველოში მის სიცოცხლესა და ჯანმრთელობას საფრთხე დაემუქრებოდა.

„მივმართავ პროკურატურას სასწრაფოდ შეწყდეს ქაშიბაძის წინააღმდეგ „შეთითხნილი“ სისხლის სამართლებრივი დევნა, აღიძრას სისხლის სამართლის საქმე დასახელებული მაღალჩინოსნების წინააღმდეგ და დადგეს ყველა იმ ფიზიკური თუ იურიდიული პირის პასუხისმგელობის საკითხი, ვინც ქაშიბაძის ქონების წართმევაში ფიგურირებდა“-განაცხადა გაბუნიამ და აღნიშნა, რომ საქმეს თან დაურთავს შესაბამის აუდიო-ვიდეომასალას.

პრესკონფერენციაზე დამსწრე წერეთლის წარმომადგენელმა დასახელებული ბრალდებები უარყო და განაცხადა, რომ შესაბამისი განცხადება უახლოეს დღეებში გაკეთდება.