თეთრიწყაროს რაიონულმა სასამართლომ დაადგინა, რომ კოალიცია „ქართული ოცნების“ აქტივისტმა მიხეილ ჩომახაშვილმა 5 ოქტომბერს მოსამართლესთან კომუნიკაციის წესი დაარღვია და ის 2 000 ლარით დააჯარიმა.

კერძოდ, თეთრიწყაროს რაიონული სასამართლოს თავმჯდომარის განკარგულებას საფუძვლად დაედო მოსამართლე სპარტაკ პავლიაშვილის წერილობითი შეტყობინება, რომელიც აცხადებს, რომ 5 ოქტომბერს, 08.00 საათზე მასთან სახლში მივიდა ჩომახაშვილი და საუბარი დაუწყო ადმინისტრაციულ საქმეზე, რომელიც იმავე დღის 10.00 საათზე თეთრიწყაროს რაიონულ სასამართლოში იხილებოდა. საქმეში მოსარჩელე მხარეს წარმოადგენდა „ერთიანი ნაციონალური მოძრაობა“, ხოლო მოპასუხე - თეთრიწყაროს N26 საოლქო საარჩევნო კომისია, საქმეში მესამე პირი იყო მაჟორიტარი დეპუტატობის კანდიდატი „ქართული ოცნებიდან“ შალვა ხაჭაპურიძე.

მიხეილ ჩომახაშვილმა განმარტა, რომ ის მართლაც იმყოფებოდა მოსამართლესთან სახლში, მაგრამ არა განსახილველ საქმესთან, არამედ ბინის დაქირავებასთან დაკავშირებით.

„სასამართლომ გაითვალისწინა საქმესთან დაკავშირებული ყველა მტკიცებულება და აღნიშნული ფაქტი მოსამართლესთან კომუნიკაციის წესის დარღვევად ჩათვალა. თეთრიწყაროს რაიონული სასამართლოს თავმჯდომარის განკარგულების თანახმად, მიხეილ ჩომახაშვილი 2000 ლარით დაჯარიმდა“ - აღნიშნულია სასამართლოს შეტყობინებაში.

ამასთანავე, სასამართლო კიდევ ერთხელ მოუწოდებს ყველა მხარეს დაიცვას კანონი და აცხადებს, რომ სასამართლო ხელისუფლების მიმართ გამოთქმული ნებისმიერი განცხადება, რომელიც შეიცავს ზეწოლის და შანტაჟის ნიშნებს, შეფასდება სამოსამართლეო უფლებამოსილების განხორციელებისთვის ხელის შეშლად და მოსამართლის საქმიანობაში უხეშ ჩარევად.