ბიზნესმენი ნაზი ალასანია კომპანია „ფასტ პლიუსის“ 45%-იანი წილის დაბრუნების მოთხოვნით სასამართლოს მიმართავს.

როგორც მან „ნიუსპრესს“ განუცხადა, ორგანიზაციაში „ფასტ პლიუსი“ 45%-იანი წილი 2012 წლის 27 აგვისტოს 1 ლარად იძულებით დაათმობინეს და ორგანიზაციის დირექტორის თანამდებობიდან გაათავისუფლეს.

მისი განცხადებით, მან პრემიერ-მინისტრობის კანდიდატის ბიძინა ივანიშვილისა და ბიზნესმენების შეხვედრაზე ბიზნესზე არსებულ ზეწოლაზე ისაუბრა, რის შემდეგაც საქმეში ჩართული პირების მხრიდან მის მიმართ მუქარა ხორციელდება.

„როცა ბიძინა ივანიშვილი ბიზნესმენებს შეგვხვდა, მაშინ ვთქვი, რომ მცირე და საშუალო ბიზნესზე ხორციელდება ზეწოლა და ბიზნესს სჭირდება მხარდაჭერა. ამის შემდგ, როგორც ჩანს იფიქრეს, რომ ჩემი კუთვნილი წილის დასაბრუნებლად ბრძოლას დავიწყებდი და გააქტიურდნენ. დაგვიწყეს მე და ჩემს ახლობლებს დარეკვები, მუქარა, შანტაჟი“ - განუცხადა „ნიუსპრესს“ ალასანიამ.

მისივე ინფორმაციით, დღეს გაურკვეველმა პირმა იმ პრესკლუბში დარეკა, რომელშიც იგი ბრიფინგის ჩატარებას გეგმავდა და მისი ჩაშლა მოითხოვა.

„ამასთან დაკავშირებით, ვგეგმავ სამართალდამცავ ორგანოებს მივმართო. შევშინდი ფიზიკურად და არა მორალურად“ - აღნიშნა ალასანიამ და დასძინა, რომ მისი სიცოცხლე და ჯანმრთელობა საფრთხეშია.

ნაზი ალასანია ჯერჯერობით, თავს იკავებს იმ კონკრეტული პირების დასახელებისგან, ვინც აღნიშნულ საქმეში ფიგურირებენ.

როგორც მან „ნიუსპრესს“ განუცხადა, „ისინი კერძო პირები არიან, რომლებიც დაახლოებული იყვნენ გარკვეულ უწყებებთან“.

„ფასტ პლიუსის“ 45%-იანი წილის დასაბრუნებლად, ნაზი ალასანიას ადვოკატები სასამართლოში სარჩელს მომავალ კვირას შეიტანენ. კომპანიას საქართველოში ბიტუმი შემოჰქონდა.