რუსთავის სასჯელაღსრულების N6 დაწესებულებაში ექვსი მსჯავრდებული შიმშილობს და მათ მიმართ წარსულში მომხდარი ფიზიკურ ზეწოლის ფაქტების გამოძიებას მოითხოვს.

ამის შესახებ სახალხო დამცველის სპეციალური პრევენციული ჯგუფის მიერ რუსთავის N6 სასჯელაღსრულების დაწესებულებაში ჩატარებული საგანგებო მონიტორინგის შედეგად გახდა ცნობილი.

კერძოდ, დაწესებულების N84 საკანში განთავსებული მსჯავრდებულები: ლაშა კვანტალიანი, ბესიკ იობიძე, ბექა ესებუა, კახა გაგიშვილი, შალვა ახვლედიანი და ვალოდია გასოიანი, მათივე განცხადებით, 23 სექტემბრიდან შიმშილობენ.

მსჯავრდებულების თქმით, მათ მიმართ სხვადასხვა დროს ქსნის N15 (ყოფილი N7), რუსთავის N16, ქუთაისის N2 და N18 სამკურნალო დაწესებულებებში განხორციელდა ფიზიკური ზეწოლა და მოითხოვენ მათ გამოძიებას.

„პროტესტის შიმშილობით გამოხატვის გარდა, 22 სექტემბერს ლაშა კვანტალიანი და ბესიკ იობიძე საკერავი ძაფით ზედა კიდურებით ერთმანეთს მიეკერენ, ხოლო დანარჩენი ოთხი -ზედა კიდურებით საწოლზე მიეკერა“ - აღნიშნულია ომბუდსმენის აპარატის განცხადებაში.

მსჯავრდებულები მოითხოვენ პროკურატურის წარმომადგენლებთან შეხვედრას და სასჯელაღსრულების დეპარტამენტის ყოფილი თანამშრომლების დავით ჭაკუას, რობერტ არაქელოვის, ალეკო მუხაძის, გოგა ბუთლიაშვილის, ლევან ლეჟავას, გიორგი კოხრეიძის, ვაჟა ცხვედიანის, დავით მუმლაძის, დათო ნარსიას, რომა რობაქიძის (ტურა), ალადაშვილის, ვინმე ალექსას, ხონსკის და ილოს დასჯას.

მათივე თქმით, უკანასკნელი დღეების განმავლობაში დაწესებულების ადმინისტრაციის მხრიდან მათ მიმართ არასათანადო მოპყრობის ფაქტებს, თუ სხვა რაიმე სახის ზეწოლას ადგილი არ ჰქონია.