გლდანის მე-8 დაწესებულებაში სასჯელაღსრულების ახალი მინისტრი გიორგი ტუღუში იმყოფება.

როგორც ტუღუშმა ჟურნალისტებთან საუბრისას აღნიშნა,დაწესებულებაში ამ დროისთვის ნორმალური მდგომარეობა და სრული სიმშვიდეა.

მისი თქმით, ციხის მე-3 კორპუსში, წუხელ მთელი ღამის განმავლობაში მუშაობდნენ, ჩაირთო ტელეფონები, პატიმრებს სატელეფონო ბარათები გადაეცათ და ახლობლებთან დაარეკვის საშუალება მიეცათ.

ტუღუშის განცხადებით, გამომდინარე აქედან, პატიმრების ოჯახებშიც სიმშვიდეა.

„მინდა ყველას ძალიან გთხოვოთ, ყველა ტელეარხმა შეწყვიტოს წამების ფირების ტრიალი, რადგან ეს ძალიან ართულებს ვითარებას, როგორც იმ პატიმრების მდგომარეობას, რომლებიც აღნიშნულ კადრებში არიან დაფიქსირებულები, ასევე, მათი ოჯახებისაც. ეს ყველაზე მტკივნეული თემაა დღეს“ - განაცხადა ტუღუშმა.

მისივე თქმით, მან პატიმრებს მიმართა, დაესახელებინათ ის პირები, რომლებიც მათ მიმართ უხეშ მოპყრობაში იყვნენ შემჩნეულნი. ამის შედეგად კი, სისტემიდან გუშინ კიდევ რამდენიმე პირი გათავისუფლდა.

პატიმრების ახლობლებმა ეზოში გიორგი ტუღუშს დახმარება სთხოვეს. თავის მხრივ, მინისტრი მათ პატიმრების უსაფრთხოების დაცვას დაჰპირდა.

ერთ-ერთი პატიმრის მშობელი აცხადებს, რომ მისი შვილი ნაცემია. მისივე თქმით, მე-3 კორპუსის ერთ-ერთ საკანში მსჯავრდებულები შიმშილობენ.

გლდანის მე-8 საპყრობილესთან მშობლები ამ დრომდე იმყოფებიან და მათი ახლობლების მოსანახულებლად რიგში დგანან. პაემნებზე დაახლოებით, 2500-მდე მოქალაქეა რეგისტრირებული. ბოლოს სამი დღის განმავლობაში მათგან პაემანზე შესვლა 1 700-მა მოახერხა.

ამ დროისთვის გლდანის საპატიმროში სამღვდელოებას ელოდებიან.