მსოფლიო ბანკთან არსებულმა საინვესტიციო დავათა განხილვის საერთაშორისო ცენტრმა ბიძინა ივანიშვილის საარბიტრაჟო განაცხადი (საჩივარი) საქართველოს მთავრობის მიმართ რეგისტრაციაში გაატარა.

როგორც სოციალურ ქსელ „ფესიბუქში“ ივანიშვილის გვერდზეა აღნიშნილი, ამის შესახებ მის სამართლებრივ მრჩევლებს ცენტრის გენერალურმა მდივანმა აცნობა.

სახელმწიფოსა და სხვა სახელმწიფოს მოქალაქეებს შორის საინვესტიციო დავების მოწესრიგების შესახებ ვაშინგტონის 1965 წლის 18 მარტის კონვენციის თანახმად, რომლის წევრიც არის საქართველოს სახელმწიფო, ცენტრი იხილავს დავას უცხოელ ინვესტორსა და მასპინძელ სახელმწიფოს შორის.

ივანიშვილის პრესსამსახურის განმარტებით, აქედან გამომდინარე, ბიძინა ივანიშვილის საჩივარი ემყარებოდა იმას, რომ საქართველოს სახელმწიფომ შელახა მისი, როგორც საფრანგეთის სახელმწიფოს მოქალაქის კანონიერი უფლებები, რადგან ყველა უკანონო ქმედება, რაც საქართველოს სახელმწიფომ ბიძინა ივანიშვილის მიმართ ჩაიდინა, განხორციელდა 2011 წლის 11 ოქტომბრის შემდეგ - მას შემდეგ, როცა საქართველოს პრეზიდენტმა ბიძინა ივანიშვილს საქართველოს მოქალაქეობა ჩამოართვა და ეს უკანასკნელი საფრანგეთის სახელმწიფოს მოქალაქე იყო.

„საჩივრის რეგისტრაციაში გატარებას წინ უსწრებდა საქართველოს მთავრობის პროტესტი, რომლითაც საქართველოს მთავრობა საჩივრის რეგისტრაციის წინააღმდეგ გამოდიოდა. სახელმწიფოს მიაჩნდა, რომ კონვენციის მიზნებიდან გამომდინარე ბიძინა ივანიშვილი საფრანგეთის მოქალაქედ არ უნდა მიჩნეულიყო. ამ მოსაზრების ერთ-ერთ საფუძვლად საქართველოს მთავრობამ დაასახელა ის, რომ 2012 წლის 27 მაისს თბილისში გამართულ მიტინგზე ბიძინა ივანიშვილმა საჯაროდ განაცხადა, რომ “მე ვარ საქართველოს მოქალაქე“ - აღნიშნულია ივანიშვილის გვერდზე.

ცენტრის მიერ საქართველოს მთავრობის პროტესტი არ იქნა გაზიარებული და საჩივარი რეგისტრირებულ იქნა.

საჩივრის რეგისრაციის შემდგომი ეტაპი საარბიტრაჟო ტრიბუნალის შექმნაა, რომლის ფორმირების შემდეგაც საქმის განხილვა დაიწყება.