საარჩევნო ბლოკ „ბიძინა ივანიშვილი - ქართული ოცნების“ სამტრედიის მაჟორიტარი დეპუტატობის კანდიდატმა კახა კალაძემ აღსრულების ეროვნულ ბიუროს ქონებრივი ნუსხა წარუდგინა.

როგორც „ნიუსპრესს“ აღსრულების ეროვნული ბიუროს პრესსამსახურში განუცხადეს, აღსრულების პროცესი ჯერ ისევ მიმდინარეობს, მისი დასულებისთანავე უწყება განცხადებას გაავრცელებს.

„თუკი განხორციელდება რაიმე ქმედითი ნაბიჯები, ან აღსრულების რა ხერხი იქნება არჩეული, ამის შესახებ საზოგადოებას დამატებით ეცნობება“ - აცხადებენ აღსრულების ეროვნული ბიუროს პრესსამსახურში.

თბილისის საქალაქო სასამართლომ სახელმწიფო აუდიტის სამსახურის ოქმის საფუძველზე კახა კალაძე 16 944 960 ლარით დააჯარიმა.

სახელმწიფო აუდიტის სამსახურის ინფორმაციით, კალაძემ საკუთარი ანგარიშიდან 3 388 992 ლარი გაანაღდა. სახელმწიფო აუდიტის სამსახურში მიიჩნიეს, რომ აღნიშნულ თანხებს კალაძე კანონის გვერდის ავლით ფიზიკურ პირებზე ანაწილებდა, რომლებიც შემდგომ თანხას შემოწირულობის სახით „ქართული ოცნების“ ანგარიშზე რიცხავდნენ.