ლოპოტას ხეობაში სპეცოპერაციის შედეგად ლიკვიდირებული დივერსანტების ნაწილი რუსეთის მოქალაქეა ჩრდილოეთ კავკასიიდან - ამის შესახებ შინაგან საქმეთა სამინისტრო ოფიციალურ ინფორმაციას ავრცელებს.  

შსს-ს ცნობით, დივერსანტთა ჯგუფის ლიკვიდირებული 11 წევრის გვამი ნაპოვნია.

„გარდაცვლილთა დაკრძალვა მოხდება მათი რელიგიური მრწამსის შესაბამისად“ - აღნიშნულია ინფორმაციაში.

ამასთან, სამინისტრო აცხადებს, რომ საფუძვლიანი ვარაუდი არსებობს იმის შესახებ, რომ შეიარაღებული ჯგუფის რამდენიმე დაჭრილი წევრი შეიძლება ხეობაში იმალებოდეს. დივერსანტთა ჯგუფი სავარაუდოდ 20 შეიარაღებული პირისგან შედგება. პოლიცია აგრძელებს მათი ძებნის ღონისძიებებს.

შსს აცხადებს, რომ ხეობაში მოსახლეობის უსაფრთხოება უზრუნველყოფილია და მათ არანაირი საფრთხე არ ემუქრებათ.

როგორც შს მინისტრის მოადგილემ შოთა ხიზანიშვილმა განაცხადა, სპეცოპერაციის ძირითადი ფაზა დასრულდა.