საქართველოს შინაგან საქმეთა სამინისტრომ ლაფანყურში მძევალთა გათავისუფლების სპეცოპერაცია დაასრულა.

როგორც „ნიუსპრესს“ შსს-ს პრესსამსახურის ხელმძღვანელმა სალომე მახარაძემ განუცხადა, დივერსანტთა ჯგუფის დევნის ოპერაცია კი, ამ დრომდე გრძელდება.

„დივერსანტთა ჯგუფის 6 წევრი ალყაშია მოქცეული, ხოლო 11 მათგანი ლიკვიდირებულია“-განაცხადა მახარაძემ.

ამ დროისთვის არ კონკრეტდება ინფორმაცია მძევალთა რაოდენობისა და მათი ჯანმრთელობის მდგომარეობის შესახებ.

საქართველო-რუსეთის საზღვრის დაღესტნის მონაკვეთთან, საქართველოს ტერიტორიაზე, შეიარაღებული ჯგუფის აღმოჩენის შესახებ ინფორმაცია შსს-მ დღეს გაავრცელა.

გავრცელებული ინფორმაციით, სავარაუდოდ, დაღესტნიდან დივერსანტთა ჯგუფი გადმოვიდა, რომელმაც რამდენიმე დღის წინ გაუჩინარებული 5 პირის გარდა, მძევალთა კიდევ ორი ჯგუფი აიყვანა.

მათ გასათავისუფლებლად სპეცოპერაცია წუხელ ღამის განმავლობაშიც მიმდინარეობდა.