ექსპერტი სამხედრო საკითხებში, კოალიცია „ქართული ოცნების“ თელავის შტაბის ხელმძღვანელი ირაკლი სესიაშვილი თელავის რაიონის სოფელ ლაფანყურში განვითარებულ მოვლენებს ბუნდოვანს უწოდებს.

როგორც ირაკლი სესიაშვილმა „ნიუსპრესთან“ საუბრისას აღნიშნა, სხვადასხვა ოფიციალური თუ არაოფიციალური ინფორმაციები ფაქტებს არ ემთხვევა.

მისი თქმით, ამის გამო, სხვადასხვა ტიპის ეჭვი ჩნდება.

„ეჭვების გამოთქმისგან ჯერჯერობით თავს შევიკავებ, მაგრამ ოფიციალური წყაროებისგან საინტერესოა ვიცოდეთ, ვინ მძევლებზეა საუბარი. გავრცელებული ინფორმაციით, მძევალთა სამი ჯგუფი იყო აყვანილი, ე.ი დივერსანტთა მინიმუმ სამი ჯგუფი მოქმედებდა“ - განაცხადა სესიაშვილმა.

მისი თქმით, ვრცელდება ინფორმაცია, რომ დივერსანტთა მხოლოდ ერთი წევრია ლიკვიდირებული, დანარჩენი ჯგუფები სადაა ამის შესახებ შსს ინფორმაციას არ ავრცელებს.

„თუ ჯგუფები ჯერ კიდევ ადგილზე არიან და მოქმედებენ, მაშინ სპეცოპერაცია ფაქტობრივად, როგორ არის დასრულებული? რაც შეეხება დაკარგულ ახალგაზრდებს, მათთან დაკავშირებითაც ბევრი გაურკვევლობაა, რაზეც მოგვიანებით ვისაუბრებ“ - აღნიშნა სესიაშვილმა.

მისივე შეფასებით, სიტუაცია იმდენად ბუნდოვანია, რომ რაიმე ღირებული ანალიზის გაკეთება რთულია.

სესიაშვილის თქმით, როცა ინფორმაცია ფაქტებს არ ემთხვევა და ხელისუფლება ინფორმაციას მალავს, ცხადია საზოგადოებას ეჭვები უჩნდება.

„სიტუაციის რეალურობაში გასარკვევად, ვცდილობთ ვითარება ჩვენი წყაროებიდან გავარკვიოთ“ - აღნიშნა ირაკლი სესიაშვილმა და დასძინა, რომ ის უახლოეს საათებში ადგილზე ჩავა და არსებულ ვითარებას გაეცნობა.

შსს-ს პრესსამსახურის ინფორმაციით, შსს სოფელ ლაფანყურში მძევალთა რამდენიმე ჯგუფის გათავისუფლების სპეცოპერაციას ახორციელებს.

პრესსამსახურის ინფორმაციით, მძევალთა ბოლო ჯგუფის გათავისუფლების დროს, ორმხრივი სროლის შედეგად დივერსანტთა შეიარაღებული ჯგუფის ერთ-ერთი წევრი იქნა ლიკვიდირებული.

გავრცელებული ინფორმაციით, საქართველო-რუსეთის საზღვარზე სავარაუდოდ, დაღესტნიდან დივერსანტთა ჯგუფი გადმოვიდა, რომელმაც რამდენიმე დღის წინ გაუჩინარებული 5 პირის გარდა, მძევლად კიდევ ორი ჯგუფი აიყვანა. მათ გასათავისუფლებლად ინტენსიური სროლა მთელი ღამის განმავლობაში მიმდინარეობდა.