„უფლებადამცველთა გაერთიანების“ თავმჯდომარე ნიკოლოზ მჟავანაძე ბახმაროში, ფერიცვალების გუშინდელ დღესასწაულთან დაკავშირებულ ღონისძიებას
„ნაციონალური მოძრაობის“ პარტიულ დღესასწაულს უწოდებს.როგორც ნიკოლოზ მჟავანაძემ დღეს გამართულ პრესკონფერენციაზე აღნიშნა, ბეშუმობისა და დიდგორობის დღესასწაულების შემდეგ, ხელისუფლებამ ბახმაროში „ნაციონალური მოძრაობის“ მხარდამჭერების გარდა, არცერთი განსხვავებული პოლიტიკური შეხედულების მქონე პირი არ შეუშვა.
მისი თქმით, დღესასწაულზე სპეციალურად მობილიზებულმა შსს-ს სპეცრაზმმა ბახმაროში არა მარტო მოსახლეობა, არამედ ჟურნალისტებიც არ შეუშვა.
„ადგილი ჰქონდა მოსახლეობის მიმართ სიტყვიერ და ფიზიკურ შეურაცხყოფას. გურიის პოლიციის თანამშრომლები ბახმაროში პრეზიდენტის ჩასვლამდე, „ნაციონალური მოძრაობის“ მაისურებს არიგებდნენ. პოლიციელების მხრიდან სამსახურებრივი უფლებამოსილების ბოროტად გამოყენებას ჰქონდა ადგილი“ - განაცხადა მჯავანაძემ.
მისივე თქმით, პოლიციელებმა დღესასწაულზე ჟურნალისტებს პროფესიულ საქმიანობაში უკანონოდ შეუშალეს ხელი, „ქართული ოცნების“ მაისურებიანი მოქალაქეები კი, აღნიშნულ ტერიტორიაზე არ შეუშვეს.
„აქამდე, მაისურებს ადგილობრივი თვითმმართველობის მესვეურები არიგებდნენ, ახლა კი, წინასაარჩევნო აგიტაციაში პოლიციის მესვეურები ჩაებნენ. მათი ქმედებები ყოველგვარ ზღვარს გადასცდა. ალბათ მარიამობის დღესასწაულზე, სამების ტაძარში „ნაცმოძრაობის“ საშვები იქნება და მხოლოდ მათ ხალხს შეუშვებენ“ - აღნიშნა მჟავანაძემ.
უფლებადამცველი ირმა ჭკადუას განცხადებით კი, აღნიშნულ დღესასწაულზე თანასწორუფლებიანობის პრინციპია დარღვეული, რადგან ნებისმიერ ადამიანს საკუთარი სურვილის მიხედვით, ნებისმიერ ტერიტორიაზე გადაადგილების უფლება აქვს, ეს უფლება კი - მოქალაქეებს პოლიციის თანამშრომლებმა შეუზღუდეს.
„უფლებადამცველთა გაერთიანება“ ხელისუფლების მიერ წინასაარჩევნოდ ადმინისტრაციული რესურსის გამოყენებისა და პოლიციის მხრიდან საარჩევნო აგიტაციასთან დაკავშირებით მასალებს სამართალდამცველ სტრუქტურებს, ასევე, უწყებათაშორის კომისიას გადაუგზავნის.
ბახმაროში გუშინ საქართველოს პრეზიდენტი მიხეილ სააკაშვილი იმყოფებოდა, რომელმაც მოსახლეობას ფერიცვალება მიულოცა და კურორტის რეაბილიტაციის ფარგლებში მიმდინარე სამუშაოები დაათვალიერა.
