„ქართუ ბანკის“ თანამშრომლები სახალხო დამცველს, არასამთავრობო ორგანიზაციებს, დიპლომატიურ კორპუსსა და უწყებათაშორის კომისიას მიმართავენ.

„ქართუ ბანკის“ თანამშრომლები სპეციალურ განცხადებას ავრცელებენ და მოითხოვენ აღნიშნულმა ორგანიზაციებმა და უწყებებმა მათი დაჯარიმების თაობაზე სათანადო რეაგირება მოხდინონ, რათა მოახლოებული არჩევნების სამართლიანი და მიუკერძოებელი ჩატარების უზრუნველსაყოფად, შეწყდეს პოლიტიკური ნიშნით მოქალაქეთა დევნა.

„ქართუ ბანკის“ თანამშრომლები აღნიშნავენ, რომ თბილისის სააპელაციო სასამართლომ უაპელაციოდ გაიზიარა საქალაქო სასამართლოს მოსამართლეების უკანონო დადგენილება და მიუხედავად უტყუარი მტკიცებულებებისა, მათ 510 ათას ლარზე მეტი ჯარიმა დააკისრა.

„ქართუ ბანკში“ მიაჩნიათ, რომ თანამშრომლების დაჯარიმება ემსახურება ხელისუფლების მიზანს, დააშინოს ქართული საზოგადოება და არ დაუშვას ოპოზიციური პარტიისადმი თანადგომის არცერთი პრეცედენტი.

„კანონსაწინააღმდეგო ოპერატიულობით უკვე გამოწერილია სააღსრულებო ფურცლები ჩვენს საკუთრებაში არსებული უძრავ-მოძრავი ქონებისა და საბანკო ანგარიშების დაყადაღებაზე, უახლოეს მომავალში აუქციონზე გაყიდვის გარანტირებული მუქარით. ამის მიუხედავად, ჩვენ არ ვაპირებთ ჯარიმების გადახდას და გვაქვს ქართული საზოგადოების აქტიური თანადგომის იმედი“- ნათქვამია განცხადებაში.

განცხადებას ხელს „ქართუ ბანკის“ თანამშრომლები აწერენ.

თბილისის საქალაქო სასამართლოს ადმინისტრაციულ საქმეთა კოლეგიამ სახელმწიფო აუდიტის სამსახურის პოლიტიკური პარტიების ფინანსური მონიტორინგის სამსახურის მიერ შედგენილი სამართალდარღვევის ოქმების საფუძველზე კოალიცია „ქართული ოცნებისთვის“ განხორციელებული შემოწირულობისთვის „ბანკი ქართუს“ 8 თანამშრომელი დააჯარიმა.

სასამართლოს 2012 წლის 10 აგვისტოს დადგენილებებით, გოჩა ბარამიძე, გოჩა ჩიკვილაძე, ნატო კოპლატაძე, დავით კაჭახიძე, ვიქტორ ჯაფარიძე, თეონა ჯახუტაშვილი, ინგა ჯავახია, მაგდანა მუშკუდიანი, დავით დარჩია, დავით მათიკაშვილი, ნინო უძილაური, ნატო ხაინდრავა, ნოდარ ჯავახიშვილი, ია გამცემლიძე, ირაკლი ბერაია, დავით გალუაშვილი ცნობილ იქნენ სამართალდამრღვევებად ,,მოქალაქეთა პოლიტიკური გაერთიანების შესახებ“ საქართველოს ორგანული კანონის 342-ე მუხლის მე-2 პუნქტით გათვალისწინებული ქმედების ჩადენისათვის და სახდელის სახით დაეკისრათ ჯარიმის გადახდა აკრძალული შემოწირულობის ხუთმაგი ოდენობით.