კოალიცია „ქართული ოცნების“ ლიდერების ბიძინა ივანიშვილისა და კახა კალაძისთვის დაკისრებულ ჯარიმებზე სააღსრულებო პროცედურები უკვე დაწყებულია.

როგორც „ნიუსპრესს“ ადვოკატმა შალვა თადუმაძემ განუცხადა, მიუხედავად იმისა, რომ კალაძეს ჯარიმის ნებაყოფლობით გადახდის 7 დღიანი ვადა 17 აგვისტოს, ხოლო ივანიშვილს 18 აგვისტოს ეწურებოდა, სააღსრულებო პროცედურები დაწყებულია, რაც მისივე თქმით, უკანონობაა.

ადვოკატის ცნობით, ივანიშვილისა და კალაძის ჯარიმას უკვე დაერიცხა აღსრულების 7% და მიეცათ დამატებით 7 დღიანი ვადა ჯარიმისა და დარიცხული პროცენტის ნებაყოფლობით გადასახდელად, რომელიც 20 აგვისტოს იწურება.

„ამის შემდეგ უკვე თავად მიიღებენ გადაწყეტილებას, რა ღონისძიებები გაატარონ იძულებითი აღსრულების ფარგლებში. აღსრულების ეროვნულ ბიუროში არ განმარტავენ რატომ დაიწყო სააღსრულებო პროცედურები, ამბობენ, სააღსრულებო ფურცელი შემოვიდა და აბა რა გვექნაო“- განუცხადა „ნიუსპრესს“ თადუმაძემ.

სასამართლომ ივანიშვილი 20 243 827 ლარით, კახა კალაძე 16 944 960 ლარით დააჯარიმა.

სახელმწიფო აუდიტის სამსახურის ინფორმაციით, პირადი ანგარიშებიდან ბიძინა ივანიშვილმა 5 552 135 ლარი, ხოლო კახა კალაძემ 3 388 992 ლარი გაანაღდა, რომლის შემდგომი მიმოქცევა არ ფიქსირდება.

სახელმწიფო აუდიტის სამსახურში მიიჩნიეს, რომ აღნიშნულ თანხებს ივანიშვილი და კალაძე კანონის გვერდის ავლით ფიზიკურ პირებზე ანაწილებდნენ, რომლებიც შემდგომ თანხას შემოწირულობის სახით „ქართული ოცნების“ ანგარიშზე რიცხავდნენ.