ნარკოდანაშაულის ბრალდებით მსახიობი და ბიზნესმენი ლევან ჯიბღაშვილი გუშინ დააკავეს.

შსს-ს ინფორმაციით, გამოძიება 260-ე მუხლის პირველი ნაწილით დაიწყო, რაც ნარკოტიკული საშუალების უკანონო შეძენა-შენახვას გულისხმობს.

ჩხრეკის შედეგად ჯიბღაშვილის ავტომობილიდან ნარკოტიკული საშუალებები ამოიღეს. ბრალის დამტკიცების შემთხვევაში ბიზნესმენს 6 წლამდე პატიმრობა ელის.

ლევან ჯიბღაშვილის ადვოკატის თქმით, დაკავებული არ უარყოფს, რომ ნარკოტიკული საშუალებები ნამდვილად მისი მანქანიდან ამოიღეს.

"ის, თუ რა ვითარებაში აღმოჩნდა ნარკოტიკი ლევან ჯიბღაშვილის მანქანაში, ეს გამოძიების დასადგენია. ჩვენ ამ თვალსაზრისით აქტიურად ვთანამშრომლობთ საგამოძიებო ორგანოებთან. ველოდებით ექსპერტიზის დასკვნას", - აცხადებს დაკავებულის ადვოკატი, ამირან გიგუაშვილი.

ამჟამად მსახიობი წინასწარი დაკავების იზოლატორში იმყოფება.