თბილისის საქალაქო სასამართლომ პარტია „მრეწველობა გადაარჩენს საქართველოს“ წევრს, კოალიცია „ქართული ოცნების“ ფოთის ორგანიზაციის ხელმძღვანელს ჯემალ მიგინეიშვილს 55 დღიანი პატიმრობა მიუსაჯა.
როგორც „ნიუსპრესს“ „მრეწველობა გადაარჩენს საქართველოს“ ლიდერმა გოგი თოფაძემ განუცხადა, სასამართლომ დღევანდელ სხდომაზე პოლიტიკური გადაწყვეტილება მიიღო.
„ბრალდებულმა პროტესტის ნიშნად, ადვოკატზე უარი განაცხადა. ბუნებრივია, რომ ის გაუგებრობაში მოხვდა. დღევანდელ სხდომაზე ვკამათობდით იმაზე, თუ რა რაოდენობის შეწირულობა შეიძლება გააკეთოს ადამიანმა, ვისაც შემოსავლის წყარო აქვს? ამაზე პასუხს ვერავინ გვცემს. გვეუბნებიან - ვინც შემოგწირავთ, იმას დავიჭერთო“ - განაცხადა თოფაძემ.
მისი თქმით, სასამართლოს აღნიშნულ გადაწყვეტილებას გაასაჩივრებენ, თუმცა, ამ საკითხზე ბრალდებულთან გასაუბრება ჯერჯერობით ვერ ხერხდება.
„სავარაუდოდ, ბრალდებულთან გასაუბრების საშუალება გვექნება. თუმცა, ის ჯერ არავის იკარებს, რადგან იცის, რომ მართალია“ - განაცხადა პარტიის ლიდერმა.
მიგინეიშვილს ბრალად პარტიის ანგარიშზე 10 ათასი ლარის შეტანა ედებოდა.
თბილისის საქალაქო სასამართლომ გუშინ ასევე, „მრეწველობა გადაარჩენს საქართველოს“ ოთხი წევრი პარტიისთვის უკანონო შემოწირულობის განხორციელების გამო, გადარიცხული თანხის ხუთმაგი ოდენობით დააჯარიმა.