საქართველოს შინაგან საქმეთა სამინისტროს მინსკში ბონდო შალიკიანის მკვლელობასთან დაკავშირებით ოფიციალური დადასტურება არ მიუღია.
ამის შესახებ „ნიუსპრესს“ შინაგან საქმეთა სამინისტროს პრეს-სამსახურში განუცხადეს.
„ამ დრომდე ქართულ მხარეს ბელორუსის სამართალდამცავების მხრიდან ფაქტის ოფიციალური დადასტურების შესახებ ინფორმაცია არ მიუღია“ - აცხადებენ შსს-ში.
ბონდო შალიკიანი და მისი თანმხლები „კავკასიური გარეგნობის“ პირი დღეს ბელორუსის დედაქალაქში მოკლეს. ამის შესახებ ინფორმაცია ინტერნეტპორტალმა „გრუზია ონლაინმა“ გაავრცელა.
შალიკიანი „ვარდების რევოლუციამდე“ იმერეთში ერთ-ერთ გავლენიან ფიგურად ითვლებოდა. ის ნავთობპროდუქტების ბიზნესს და ადგილობრივ ტელეკომპანია „ქუთაისს“ ფლობდა.
შალიკიანი სხვადასხვა პოლიტიკურ ძალას, ასევე, იმერეთის ყოფილ გუბერნატორს თემურ შაშიაშვილს არაერთხელ დაუდანაშაულებია კრიმინალურ სამყაროსთან კავშირში.
ბონდო შალიკიანი 2003 წლის 2 ნოემბერს ტყიბულის მაჟორიტარ დეპუტატად აირჩიეს, ხოლო 2004 წლის 4 მარტს ქუთაისში ჩატარებული სპეცოპერაციის დროს ის დააკავეს. პოლიციის ცნობით, მის საცხოვრებელ სახლში ჩატარებული ჩხრეკის დროს ცეცხლსასროლი იარაღი აღმოჩნდა.