შპს „ბურჯის“ ქონება აუქციონზე გაიყიდა. როგორც „ნიუსპრესს“ აღსრულების ეროვნულ ბიუროში განუცხადეს, დღეს გახდება ცნობილი, თუ რამდენად გაიყიდა ქონება.

მათივე ცნობით, მყიდველს შეძენილი ქონების საფასურის გადახდა 10 დღის განმავლობაში შეუძლია, მისი ვინაობაც მხოლოდ თანხის სრულად გადახდის შემდეგ გასაჯაროვდება.

„აუქციონზე გატანილი იყო „ბურჯის“ უძრავი და მოძრავი ქონება, ავტოსატრანსპორტო საშუალებები. მყიდველის ვინაობა ჯერ არ დასახელდება, სანამ 10 დღის განმავლობაში არ გადაიხდის საბოლოო თანხას და არ დაფიქსირდება სამეწარმეო რეესტრში“- განუცხადეს „ნიუსპრესს“ აღსრულების ეროვნული ბიუროს პრესსამსახურში.

„ბურჯის“ ქონების საწყისი ფასი აუქციონზე 5 153 831 ლარი იყო, მისი ქონების საერთო საბაზრო ღირებულება კი, 10 307 663 ლარს შეადგენდა.

შპს „ბურჯი“ სახელმწიფო აუდიტის სამსახურის ოქმების საფუძველზე დაჯარიმდა. მას ჯარიმა კოალიცია „ქართული ოცნებისთვის“ ავტომობილების შეღავათიან ფასად მიქირავებისთვის დაეკისრა.

ჯარიმის გადახდაზე უარის თქმის შემდეგ, აღსრულების ეროვნულმა ბიურომ „ბურჯის“ ქონება აუქციონზე გაიტანა.