ადამიანის უფლებათა ცენტრის მიერ მომზადებული სარჩელით, მოქალაქე ბესიკ ადამია საარჩევნო კოდექსის 116-ე მუხლის მე-7 ნაწილის არაკონსტიტუციურად ცნობას ითხოვს.

როგორც „ნიუსპრესს“ ადამიანის უფლებათა ცენტრიდან აცნობეს, ადამია 1 ოქტომბრის საპარლამენტო არჩევნებში ქუთაისის #59 ერთმანდატიან მაჟორიტარულ საარჩევნო ოლქში მაჟორიტარი დეპუტატობის დამოუკიდებელ კანდიდატად მონაწილეობას გეგმავს.

ცენტრის ინფორმაციით, არჩევნებში მონაწილეობის მისაღებად „საქართველოს საარჩევნო კოდექსის“ 116-ე მუხლის მე-7 ნაწილის შესაბამისად, მისი კანდიდატურის წარმდგენმა ამომრჩეველთა საინიციატივო ჯგუფმა საოლქო საარჩევნო კომისიას მხარდამჭერ ამომრჩეველთა ხელმოწერების სია უნდა წარუდგინოს.

ბესიკ ადამიამ ასევე, ცესკო-ს მიერ მითითებულ ანგარიშზე მაჟორიტარი დეპუტატობის კანდიდატის მიერ 5 000-ლარიანი დეპოზიტის განთავსების დამადასტურებელი საბანკო დოკუმენტი უნდა წარადგინოს.

„აღნიშნულ დეპოზიტზე შეტანილი თანხა კანდიდატს სრულად მხოლოდ იმ შემთხვევაში უბრუნდება, თუ აღნიშნულ არჩევნებში მონაწილე ამომრჩეველთა ხმების 10%-ს მაინც მიიღებს. წინააღმდეგ შემთხვევაში, თანხა საქართველოს სახელმწიფო ბიუჯეტში ირიცხება“ - აცხადებენ ადამიანის უფლებათა ცენტრის წარმომადგენლები.

მათი ინფორმაციით, თუ კანდიდატი 5000-ლარიანი დეპოზიტის საბანკო დოკუმენტს არ წარადგენს, მას რეგისტრაციაში არ გაატარებენ.

აღნიშნულთან დაკავშირებით, ბესიკ ადამიამ ადამიანის უფლებათა ცენტრის მიერ მომზადებული კონსტიტუციური სარჩელი სასამართლოში 27 ივლისს შეიტანა.

„კონსტიტუციურ სარჩელში, მოვითხოვთ, რომ სასამართლომ, საქმეზე საბოლოო გადაწყვეტილების მიღებამდე, საარჩევნო კოდექსის 116-ე მუხლის მე-7 ნაწილის სადავო დებულება შეაჩეროს. წინააღმდეგ შემთხვევაში, მისმა მოქმედებამ შესაძლოა, მოსარჩელის უფლებას - სხვა საარჩევნო სუბიექტებთან თანაბარ პირობებში მიიღოს არჩევნებში მონაწილეობა, გამოუსწორებელი ზიანი მიაყენოს“ - აცხადებენ ცენტრის წარმომადგენლები.

ამასთან, მათი განცხადებით, მოსარჩელეს აღნიშნული 5000 ლარის გადახდის შესაძლებლობა არ აქვს.

ბესიკ ადამია საკონსტიტუციო სასამართლოს სთხოვს, მაქსიმალურად შემჭიდროვებულ ვადებში განიხილოს სარჩელი, ვინაიდან დაგვიანებამ შესაძლოა, მის უფლებებს ზიანი მიაყენოს.