აღსრულების ეროვნულ ბიუროში დღეს, ახალი სერვისის - „ფაქტების კონსტატაციის“ პრეზენტაცია გაიმართება.
როგორც „ნიუსპრესს“ აღსრულების ეროვნული ბიუროდან აცნობეს, ახალი სერვისი მოქალაქეებს მათთვის მნიშვნელოვანი ფაქტის დაფიქსირების და ოქმის მიღების შესაძლებლობას მისცემს, რომელსაც მტკიცებულებად გამოიყენებს.
„ფაქტების კონსტატაციის“ სერვისის ძირითადი მიზანი ფაქტის დადგენა და მომხდარზე ოქმის შედგენაა. ის ფაქტებზეა კონცენტრირებული და არა მისი მიზეზების დადგენაზე.
მოქალაქის მიერ ფაქტის დადასტურების თხოვნით მიმართვის შემდეგ, აღმასრულებელი ადგილზე აფიქსირებს კონკრეტულ სიტუაციას - ფაქტს. ზუსტად აღწერს ფაქტებს ოქმში, რომელიც რაიმე შეფასებისგან თავისუფალია. დაურთავს ყველა მიღებულ მასალას ოქმს, რომელიც ფაქტის არსებობას ამტკიცებს.
აღსრულების ეროვნული ბიუროს ინფორმაციით, „ფაქტების კონსტატაციის“ სერვისი მტკიცების სტადიის ხარჯზე სასამართლო პროცესების ხანგრძლივობას მნიშვნელოვნად შეამცირებს და ინტელექტუალური საკუთრების დაცვის გაძლიერებას შეუწყობს ხელს.
ფაქტების კონსტატაციის სერვისით მოსახლეობას შემდეგი სახით შეუძლია ისარგებლოს - ქონების გაქირავებამდე მისი მდგომარეობის ასახვისთვის, სამეზობლო დავებისას - წყლის ჩამოშვებისას, საერთო სარგებლობის კიბით, სხვენით ან გზით სარგებლობის ხელისშეშლის შემთხვევაში, ჩუქების, ქონების გაყოფის, ასევე, მემკვიდრეობით მიღების დროს ქონების სრული ინვენტარიზაციისთვის და სხვა.