საქართველოს სახალხო დამცველი გიორგი ტუღუში საქართველოს მთავარ პროკურორს მოუწოდებს „მე-9 არხის” ჟურნალისტის ნოდარ ჩაჩუას  მიმართ განხორციელებული მუქარის ფაქტზე გამოძიება დაიწყოს.

როგორც „ნიუსპრესს“ სახალხო დამცველის აპარატიდან აცნობეს, „მე-9 არხის” ჟურნალისტის ნოდარ ჩაჩუას მიმართ განხორციელებული მუქარის შესახებ ინფორმაციის გავრცელების დღესვე, მას სახალხო დამცველის წარმომადგენლები შეხვდნენ და ახსნა-განმარტება ჩამოართვეს.

სახალხო დაცველის პრესსამსახურის ინფორმაციით, ახსნა–განმარტების თანახმად, 2012 წლის 23 ივლისს, დაახლოებით 18:00 საათზე, თბილისში, მელიქიშვილის ქუჩაზე ჩაჩუას უცნობი მამაკაცი შეხვდა, რომელმაც მოსთხოვა ჩამჯდარიყო იქვე მდგარ ავტომანქანაში. ჟურნალისტი დაემორჩილა უცნობი მამაკაცის მოთხოვნას, ჩაჯდა ავტომანქანაში, სადაც მას კიდევ ორი პირი დახვდა. ავტომობილში ჩაჯდომისთანავე უცნობმა პირებმა მას სიტყვიერი შეურაცხყოფა მიაყენეს, აჩვენეს მისი პირადი ცხოვრების ამსახველი ვიდეოჩანაწერი და განუცხადეს, რომ მათი დავალებების შეუსრულებლობის შემთხვევაში, ჩანაწერს გაასაჯაროებდნენ. როგორც ჟურნალისტი აღნიშნავს, აღნიშნულ პირებს მისთვის ვინაობა არ უცნობებიათ, მხოლოდ ის განუმარტეს, რომ ,,სამსახურის“ წარმომადგენლები იყვნენ და შეეძლოთ მისთვის პრობლემების შექმნა.
აღნიშნული პირები ჟურნალისტს განმეორებით 2012 წლის 26 ივლისს შეხვდნენ, როდესაც კვლავ აგრძელებდნენ მსგავს რიტორიკას.

სახალხო დამცველს მიაჩნია, რომ ნოდარ ჩაჩუას მიერ ახსნა-განმარტებაში მოცემული ინფორმაცია საქართველოს სისხლის სამართლის კოდექსით გათვალსიწინებულ დანაშაულის ნიშნებს შეიცავს და აცხადებს, რომ აღნიშნული ფაქტების შესწავლა და სათანადო რეაგირების განხორციელება საგამოძიებო ორგანოების კომპეტენციაა.