„ქართუ ბანკის“ სამეთვალყურეო საბჭომ იძულებითი მმართველობის დროს გაცემული ყველა სესხის ბათილად ცნობის გადაწყვეტილება  მიიღო. ამის შესახებ „ნიუსპრესს“ „ქართუ ბანკის“ იურისტმა მზია თოდუამ განუცხადა.

მისი თქმით, დროებითი მმართველობის დროს ბანკის მიერ 50 მლნ ლარამდე სესხის გაცემის გადაწყვეტილება უკვე გაბათილებულია, რადგან აღნიშნული გარიგება ბანკისთვის ზიანის მომტანი იყო.

„ბანკის სამეთვალყურეო საბჭომ კანონით მისთვის მინიჭებული უფლებამოსილების ფარგლებში მიიღო გადაწყვეტილება ბათილად გამოაცხადოს ყველა გარიგება, რომელიც დაიდო ბანკის დროებითი მმართველობის პერიოდში, საუბარია გარიგებებზე, რომლებიც ზიანის მომტანია ბანკისთვის, ეს კი იმას ნიშნავს, რომ მათი შესრულების შემთხვევაში, ბანკი შეიძლება ლიკვიდობის საფრთხის წინაშე დადგეს“- განუცხადა „ნიუსპრესს“ თოდუამ.

მისივე განმარტებით, კომპანიებმა, რომლებმაც ბანკთან დროებითი მმართველობის დროს სასესხო ხელშეკრულებები გააფორმეს, პრეტენზიის შემთხვევაში, შეუძლიათ სამართლებრივი გზით იდავონ.

„ქართუ ბანკში“ მიაჩნიათ, რომ სამეთვალყურეო საბჭომ სამართლებრივად დასაბუთებული გადაწყვეტილება მიიღო.

იურისტის თქმით, ბანკის დროებითმა ხელმძღვანელობამ სესხების გაცემის შესახებ გადაწყვეტილების მიღების დროს ბანკის ინტერესების გათვალისწინებით არ იმოქმედა.
„ვფიქრობთ, რომ მაშინდელმა ხელმძღვანელობამ ბანკის სტაბილურობის ინტერესებით კეთილსინდისიერად კი არ იმოქმედა, არამედ იმ მიზნით, რომ ბანკის საქმიანობას საფრთხე შექმნოდა და შემდეგ ამოქმედებულიყო ის ნორმები, რომელიც ითვალისწინებს ეროვნული ბანკის მიერ კომერციული ბანკების შესახებ კანონით გათვალისწინებული დროებითი ადმინისტრაციის შემოყვანას. სხვა მხრივ ამას ახსნა არ აქვს“- განაცხადა იურისტმა.

„ქართუ ჯგუფსა“ და „ქართუ ბანკში“ დროებითი მმართველობა 26 ივლისს შეწყდა. მას შემდეგ, რაც კოალიცია „ქართული ოცნების“ ლიდერმა ბიძინა ივანიშვილმა დაკისრებული ჯარიმა გადაიხადა, საქალაქო სასამართლომ მის მიერ დანიშნულ იძულებით მმართველს ვლადიმერ უგულავას „ქართუ ჯგუფსა“ და „პროგრეს ბანკში“ უფლებამოსილება შეუჩერა.