აღსრულების ეროვნული ბიურო „ქართუ ჯგუფისა“ და „პროგრეს ბანკის“ აქციებზე ყადაღას დღეს, დღის ბოლომდე მოხსნის.
როგორც „ნიუსპრესს“ აღსრულების ეროვნული ბიუროს პრესსამსახურში განუცხადეს, ყადაღა „ქართუ ჯგუფის“ აქციების 100% და „პროგრეს ბანკის“ 21,7%-ს მას შემდეგ მოეხსნება, რაც აღსრულების ეროვნული ბიურო საქალაქო სასამართლოს განჩინებას მიიღებს, რის საფუძველზეც, დაყადაღებულ ქონებაზე ყადაღას მოხსნის და იძულებით მმართველს ვლადიმერ უგულავს მისი უფლებამოსილების შეწყვეტის თაობაზე შეტყობინებას გაუგზავნის.
თბილისის საქალაქო სასამართლომ აღსრულების ეროვნული ბიუროს შუამდგომლობის საუძველზე, დღეს „ქართულ ჯგუფსა“ და „პროგრეს ბანკში“ იძულებითი მართვის შეწყვეტის თაობაზე გადაწყვეტილება მიიღო. სასამართლოს გადაწყვეტილებით, იძულებითი მმართველი თანამდებობიდან დაუყოვნებლივ უნდა გათავისუფლდეს.

თბილისის საქალაქო სასამართლომ „ქართუ ჯგუფის“ აქციათა 100%-ზე და „პროგრეს ბანკის“ აქციათა 21,7%-ზე იძულებითი მმართველობის მოხსნის შუამდგომლობით მას შემდეგ მიმართა, რაც ბიძინა ივანიშვილმა დაკისრებული ჯარიმა სრულად გადაიხადა, რომელიც მას ამომრჩევლის მოსყიდვის მიზეზით დაეკისრა.
კომპანიებში იძულებით მმართველად სასამართლომ ვლადიმერ უგულავა აღსრულების ეროვნული ბიუროს შუამდგომლობის საფუძველზე მას შემდეგ დანიშნა, რაც ივანიშვილმა ჯარიმის გადახდაზე უარი განაცხადა.
ბიძინა ივანიშვილმა სტიქიის შედეგად დაზარალებულთა დასახმარებლად, საქართველოს ბიუჯეტში 80 მლნ ლარი სასამართლოს მიერ მითითებულ ანგარიშზე 24 ივლისს გადარიცხა.