აღსრულების ეროვნულმა ბიურომ შპს „ბურჯის“ საკუთრებაში არსებულ უძრავ ქონებასა და მექანიკურ სატრანსპორტო საშუალებებზე აუქციონი გამოაცხადა.
როგორც „ნიუსპრესს“ აღსრულების ბიუროდან აცნობეს, შპს ,,ბურჯის“ ქონების საერთო საბაზრო ღირებულება 10 307 663 ლარს შეადგენს. „სააღსრულებო წარმოებათა შესახებ" საქართველოს კანონის შესაბამისად კი, იძულებით საჯარო აუქციონზე განთავსებული ქონების საწყისი ფასია ექსპერტის მიერ დადგენილი საბაზრო ღირებულების 50%, შესაბამისად შ.პ.ს. „ბურჯი“-ს ქონების საწყისი ფასია 5 153 831,5 ლარი.
თბილისის საქალაქო სასამართლოს მიერ 2012 წლის 16 ივლისს საარჩევნო კამპანიის დაფინანსების შესახებ კანონმდებლობის დარღვევის გამო გაცემული სააღსრულებო ფურცლების საფუძველზე შპს ,,ბურჯს“ ჯარიმის სახით 11 018, 105 ლარის გადახდა დაეკისრა, მას ასევე გადასახდელად დაეკისრა აღსრულების საფასური 771 267,35 ლარის ოდენობით.
განაცხადი აუქციონის შესახებ განთავსებულია ვებ-გვერდზე www.eauction.ge .
აღსრულების ეროვნულ ბიუროში აცხადებენ, რომ მოვალის მიერ მასზე დაკისრებული თანხის გადახდის შემთხვევაში, უქმდება ყველა სააღსრულებო ღონისძიება, შესაბამისად, წყდება აუქციონის მიმდინარეობა და იხსნება ქონებაზე დადებული ყადაღა.