სექსუალური ორიენტაციისა და გენდერული იდენტობის საკითხებში გაერთიანებული ერების ორგანიზაციის დამოუკიდებელი ექსპერტის - ვიქტორ მადრიგალ-ბორლოზის შეფასებით, 2018 წლის დასაწყისში, საქართველოს შინაგან საქმეთა სამინისტროს მხრიდან ადამიანის უფლებათა დაცვის დეპარტამენტის შექმნა სიძულვილის მოტივით ჩადენილი დანაშაულების ეფექტიანი გამოძიების ნების არსებობაზე მიუთითებს.



ექსპერტის განცხადებით, სიძულვილის მოტივით ჩადენილ დანაშაულთა გამოძიების მონიტორინგის მანდატით დეპარტამენტის აღჭურვამ ამ დანაშაულების გამოძიებისადმი სამინისტროს მიდგომა სხვა ხარისხში აიყვანა.



ვიქტორ მადრიგალ-ბორლოზი მიესალმება სიძულვილის მოტივით ჩადენილი დანაშაულის ფაქტების სათანადოდ და ეფექტიანად გამოძიების შესახებ სამინისტროს გაცხადებულ პოლიტიკას.



აღსანიშნავია, რომ შინაგან საქმეთა სამინისტროს ადამიანის უფლებათა დაცვის დეპარტამენტმა, 9 თვის განმავლობაში განხორციელებული ინტენსიური მუშაობის შედეგად, დისკრიმინაციული მოტივით ჩადენილი დანაშაულის 95 ფაქტი გამოავლინა. კერძოდ, სისხლის სამართლის 80 საქმეში გამოიკვეთა გენდერის/სქესის ნიშნით დისკრიმინაცია, ხოლო 11 საქმეში - სექსუალური ორიენტაცია და გენდერული იდენტობა. 4 საქმეში კი დანაშაულის ჩადენა განხორციელდა ეთნიკური და რასობრივი შეუწყნარებლობის მოტივით.



2018 წლის 9 თვის განმავლობაში, გამოძიების მიმდინარეობისას დისკრიმინაციული მოტივის გამოვლენის შემთხვევები, ოფიციალური მონაცემებით, გაორმაგებულია. საქართველოს მთავარი პროკურატურის ანგარიშის თანახმად, 2017 წელს, სიძულვილით მოტივირებული დანაშაულისთვის სისხლისსამართლებრივი დევნა 44 პირის მიმართ დაიწყო.