პოლიტიკური კოალიცია „ქართული ოცნება“ საქალაქო სასამართლოს ანტიკონსტიტუციური გადაწყვეტილებების მიღებაში ადანაშაულებს.

როგორც დღევანდელ ბრიფინგზე კოალიციის პრესსპიკერმა მაია ფანჯიკიძემ განაცხადა, სასამართლომ საპროცესო დარღვევით განიხილა და გადაწყვიტა 17 ფიზიკური პირისთვის ადმინისტრაციული სახდელის დაკისრების საკითხი. მისივე თქმით, ისინი უკანონო შემოწირულობის განხორცილებისთვის ჯამში 1.2 მლნ ლარით დაჯარიმდნენ.

„ერთ-ერთი პირი, რომელიც დიაბეტით იყო დაავადებული, ერთსაათიან შესვენებას ითხოვდა კვებისთვის, რის გამოც ის მოსამართლემ დარბაზიდან გააძევა. ყველაზე აღმაშფოთებლი იყო ის, რომ სასამართლომ უკანონოდ გაათავისუფლა აუდიტის სამსახური მტკიცების ტვირთისგან და ეს უკანასკენელი ადმინისტრაციულ პასუხისგებაში მიცემულ პირებს დააკისრა, რითიც შელახა ადამიანის უდანაშაულობის პრეზუმფციის პრინციპები“- აღნიშნა ფანჯიკიძემ.

მისივე შეფასებით, ასევე, დიდი დარღვევებით ჩატარდა თბილისის საქალაქო სასამართლოში კომპანია „ელიტა ბურჯის“ საქმეზე პროცესი, რის შედეგაც იგი 3.4 მლნ ლარით დაჯარიმდა.

მისივე შეფასებით, აუდიტის სამსახურმა წესად გადააქცია სასამართლო შუამდგომლობების პარასკევს საღამოს დაყენება, თავის მხრივ, სასამართლოებმაც წესად აქციეს პროცესების არასამუშაო დღეებში ჩატრება. ამის მიზანი კი, ადმინისტრაციულ პასუხისმგებლობაში მიცემული პირების დაცვის მხარისთვის მომზადებასა და მტკიცებულებების შეგროვებაში ხელის შეშლაა.