თბილისის სააპელაციო სასამართლომ ტელეკომპანია „მაესტროს“ წარმომადგენელთა საჩივრის განხილვაზე უარი თქვა.
როგორც „ნიუსპრესს“ „მაესტროს“ დამფუძნებელმა  მამუკა ღლონტმა განუცხადა, სასამართლომ არ განმარტა მიზეზი, რის გამოც საქმე წარმოებაში არ მიიღო.
„სარჩელი შევიტანეთ სასამართლოში, თუმცა, სასამართლომ საქმის განხილვაზე უარი გვითხრა. მეტიც, შემდგომი გასაჩივრების უფლებაც ჩამოგვართვა. მიზეზი განმარტებული არ არის. ვაპირებთ ბრძოლას და ჩვენი უფლებების მოპოვებას, ისევე, როგორც ეს აქამდე გაუკეთებია „მაესტროს“- განუცხადა „ნიუსპრესს“ მამუკა ღლონტმა.
თბილისის საქალაქო სასამართლომ მთავარი პროკურატურის მიმართვის საფუძველზე, ტელეკომპანია „მაესტროს“ სატელიტური ანტენები დააყადაღა.
პროკურატურის ინფორმაციით, სატელევიზიო ანტენების უსასყიდლოდ გადაცემით, ამომრჩეველთა მოსყიდვის ფაქტებზე დაწყებული გამოძიების ფარგლებში, პროკურატურამ პოლიტიკურ ორგანიზაცია „ქართულ ოცნებასთან” დაკავშირებული კომპანია „ელიტა ბურჯის“ ხელმძღვანელ პირთა დავალებით, კომპანია „მაესტროს“ მიერ საქართველოში დიდი ოდენობით ანტენების შემოტანის ფაქტი დაადგინა.

პროკურატურის განცხადების თანახმად, მტკიცებულებები მიუთითებს, რომ აღნიშნულ ანტენებს მოსახლეობისთვის უსასყიდლოდ გადასაცემად გამოიყენებენ, იმავე სქემით, როგორც ეს „გლობალ კონტაქტ კონსალტინგის“ მიერ განხორციელდა. პროკურატურის განცხადებით, ყადაღის გამოყენების ღონისძიებები შესაძლო დანაშაულებრივი ჩარევისგან წინაასარჩევნო პროცესების დაცვას და პოლიტიკური პარტიებისა და მოქალაქეების საარჩევნო უფლებებისა და გამოხატვის თავისუფლების უზრუნველყოფას ისახავს მიზნად.