პოლიტიკური კოალიცია „ქართული ოცნების“ ადვოკატმა სანდრო ბარამიძემ დღეს, თბილისის სააპელაციო სასამართლოში შპს „ელიტა ბურჯის“ დაჯარიმებასთან დაკავშირებით სარჩელი შეიტანა.

როგორც ბარამიძემ „ნიუსპრესთან“ საუბრისას განაცხადა, საქმის განხილვის თარიღი ჯერ ცნობილი არ არის.

მისი თქმით, საქალაქო სასამართლოს გადაწყვეტილება შპს „ელიტა ბურჯის“ 3,4 მლნ ლარით დაჯარიმებასთან დაკავშირებით უკანონოა, ამიტომ კომპანია უკანონო გადაწყვეტილების ნებაყოფლობით შესრულებას არ აპირებს.

„სასამართლომ დაჯარიმების შესახებ გადაწყვეტილება კომპანიის მიერ პოლიტიკური კოალიცია „ქართული ოცნებისთვის“ გაწეული მომსახურების გამო მიიღო და უკანონო შემოწირულობის თანხა არა მომსახურების ღირებულებით, არამედ სტამბის აპარატების ღირებულებით გამოითვალა“ - აღნიშნა ბარამიძემ.

სახელმწიფო აუდიტის სამსახურის ფინანსური მონიტორინგის სამსახურმა შპს „ელიტა ბურჯი“ სამართალდამრღვევად სცნო და მის საბანკო ანგარიშებსა და უძრავ-მოძრავ ქონებას ყადაღა დაადო. ამის შესახებ ფინანსური მონიტორინგის სამსახურმა განცხადება 14 ივლისს გაავრცელა.

განცხადების თანახმად, დოკუმენტაციის შესწავლის დროს დადგინდა, რომ კომპანიამ „ქართული ოცნების“ მომსახურების მიზნით, მიმდინარე წელს ორი ერთეული ოფსეტური ბეჭდვის აპარატი შეიძინა, რომლის ღირებულება 679.487.94 ლარია.

მათივე ინფორმაციით, შპს „ელიტა ბურჯს“ პოლიგრაფიული და მასთან დაკავშირებული საქმიანობა წარსულში არ განუხორციელებია. შესაბამისად, დანადგარები და აღჭურვილობა კომპანიის მიერ საგანგებოდ პოლიტიკური სუბიექტის საქმიანობის მხარდასაჭერადაა შეძენილი.

შპს „ელიტა ბურჯთან“ დაკავშირებით სასამართლო სხდომა 14 ივლისს გაიმართა, სადაც კომპანია უკანონო შემოწირულობისთვის თანხის ხუთმაგი ოდენობით - 3,4 მლნ ლარით დააჯარიმეს.