სახელმწიფო აუდიტის სამსახური „ბანკი ქართუს“ გენერალურ დირექტორს ნოდარ ჯავახიშვილს პირად ანგარიშზე ჩარიცხული  სოლიდური თანხის ხარჯვის მიზნობრიობის დასადგენად დოკუმენტალურად დადასტურებული ინფორმაციის წარდგენას სთხოვს.
ამის შესახებ სახელმწიფო აუდიტის სამსახურის წერილშია აღნიშნული.
როგორც ინფორმაციაშია ნათქვამი, სახელმწიფო აუდიტის სამსახურის მიერ ოფიციალურად მოპოვებული ინფორმაციით დასტურდება, რომ გაცხადებული პოლიტიკური მიზნების და ამოცანების მქონე ფიზიკური პირის - ბიძინა ივანიშვილის და მისი მეუღლის, ეკატერინე ხვედელიძის საბანკო ანგარიშებიდან, 2012 წლის განმავლობაში, სს „ბანკი ქართუს“ გენერალური დირექტორის ნოდარ ჯავახიშვილის პირად ანგარიშზე 6 მილიონ ლარამდე თანხა ჩაირიცხა, რომელიც ჯავახიშვილმა ჩარიცხვისთანავე გაიტანა ბანკიდან.
„რადგან ბიძინა ივანიშვილი, მისი საჯაროდ გაცხადებული საარჩევნო მიზნებიდან და ამოცანებიდან გამომდინარე, „მოქალაქეთა პოლიტიკური გაერთიანებების შესახებ“ საქართველოს ორგანული კანონის 261 მუხლით გათვალისწინებული სუბიექტია, ამავდროულად, უკვე არაერთხელ აქვს დარღვეული პოლიტიკური დაფინანსების შესახებ კანონმდებლობის მოთხოვნები, არსებობს დასაბუთებული ვარაუდის საფუძველი, რომ ზემოაღნიშნული ტრანზაქციები შესაძლოა, მის პოლიტიკურ საქმიანობას უკავშირდებოდეს“ - ნათქვამია განცხადებაში.
მათივე ინფორმაციით, შესაძლოა, ნოდარ ჯავახიშვილის მიერ განაღდებული მილიონობით ლარი ორგანული კანონის გვერდის ავლით იხარჯებოდეს.
„იმისათვის, რომ სახელმწიფო აუდიტის სამსახურმა ბიძინა ივანიშვილის მიერ ნოდარ ჯავახიშვილის პირად ანგარიშზე ჩარიცხული სოლიდური თანხების ხარჯვის მიზნობრიობის საქართველოს კანონმდებლობის მოთხოვნებთან შესაბამისობაზე გონივრული რწმუნება მიიღოს, ფინანსური მონიტორინგის სამსახურმა სს „ბანკი ქართუს“ გენერალურ დირექტორს მიღებული დაფინანსების შედეგად განხორციელებული საქმიანობისა და ხარჯების შესახებ დოკუმენტალურად დადასტურებული ინფორმაციის წარდგენა სთხოვა“ - ნათქვამია განცხადებაში.
მათივე ინფორმაციით, ნოდარ ჯავახიშვილმა აღნიშნული დოკუმენტაცია სამი დღის ვადაში უნდა წარადგინოს.