შინაგან საქმეთა სამინისტროს გადაუდებელი დახმარების ოპერატიული მართვის ცენტრი „112“ მუდმივად სთავაზობს სხვადასხვა სერვისს მოსახლეობას, რომელიც, პირველ რიგში, მორგებული არის მათ საჭიროებასა და კეთილდღეობაზე.

ამასთან დაკავშრებით ინფორმაციას შინაგან საქმეთა სამინისტროს პრესსამსახურის ავრცელებს.

მიმდინარე წლის 20 თებერვალს გაიმართა ახალი პროგრამული უზრუნველყოფის პრეზენტაცია, რომელიც შეიქმნა „112“-ის ბაზაზე და ეს არის შინაგან საქმეთა სამინისტროსა და თბილისის მერიის ერთობლივი პროექტი. ეს პროგრამა გულისხმობს დისპეტჩერიცაზიის გამარტივებულ პროცესს, რომელიც უზრუნველყოფს „112“-ში შემოსული შეტყობინების ელექტრონულად მიმოცვლას ჩვენს მომიჯნავე სამსახურებთან, ამ შემთხვევაში, ეს არის თბილისის საპატრულო პოლიცია და თბილისის სასწრაფო სამედიცინო დახმარების ცენტრი. „112“-ში შემოსული შეტყობინება ონლაინ რეჟიმში გადაეცემა აღნიშნულ სამსახურებს, რაც კიდევ უფრო ოპერატიულს გახდის ჩვენს მუშაობას.

პროგრამის ერთ-ერთი მთავარი უპირატესობა არის ის, რომ მინიმუმამდე დაჰყავს ვერბალური კომუნიკაცია და ის სავარაუდო ცდომილება, რაც შეიძლება, ვერბალური კომუნიკაციის დროს მოხდეს, ისეთ შემთხვევებში, როდესაც წამები გადამწყვეტია. სწორედ ამ ელექტრონული სისტემის მეშვეობით თავიდან ავიცილებთ ცდომილების ალბათობას.

როდესაც „112“-ში შემოდის შეტყობინება, ოპერატორი იღებს ინფორმაციას და შემდეგ გადასცემს დისპეტჩერს, რომელიც შესაბამის სამსახურს აწვდის რეაგირებისთვის საჭირო ინფორმაციას, ინციდენტის ტიპს, ასევე, თუ სად უნდა მივიდეს ესა თუ ის ბრიგადა - ზუსტად ეს არხი გახდა ელექტრონული და მინიმუმამდე შემცირდა ვერბალური კომუნიკაცია, რადიოსიგნალი თუ სატელეფონო კომუნიკაცია. საპატრულო პოლიციის ეკიპაჟებსა და სასწრაფო სამედიცინო დახმარების ცენტრის ბრიგადებში დამონტაჟდა პლანშეტები და ინფორმაციის ელექტრონული მიმოცვლის პროგრამა, რაც, საერთო ჯამში, ძალიან დიდ დროს ზოგავს თითოეული ინციდენტის დროს.

ამ ეტაპზე, კონკრეტულად მხოლოდ თბილისის სასწრაფო სამედიცინო დახმარების ბრიგადებისა და პოლიციის ეკიპაჟებისთვის მოხდა ელექტრონული სისტემის მიმოცვლის პროგრამის დანერგვა, სამომავლოდ იგეგმება, რომ სახანძრო-სამაშველო სამსახურიც დაიფაროს აღნიშნული კომუნიკაციის არხით.

მთელი თბილისის მასშტაბით, პლანშეტებით სრულად არის აღჭურვილი სასწრაფო სამედიცინო დახმარების მანქანები და საპატრულო პოლიციის ეკიპაჟები.

ეს პროგრამა შეიქმნა „112“-ის ბაზაზე, რისთვისაც მინდა, დიდი მადლობა გადავუხადო „112“-ის პროგრამისტებს.

ეს პროგრამა საპილოტედ გაშვებული იყო რამდენიმე რეგიონში. პირველ ეტაპზე იგი დაინერგა თბილისში, სამომავლოდ კი რეგიონებსაც დაფარავს, ვმუშაობთ ამ მიმართულებით, რომ რეგიონებმაც ისარგებლონ მსგავსი სერვისით, რათა კიდევ უფრო სრულყოფილი გახდეს ჩვენი მოქალაქეებისთვის გადაუდებელი დახმარების გაწევა.

შინაგან საქმეთა სამინისტროს გადაუდებელი დახმარების ოპერატიული მართვის ცენტრი „112“ მუდმივად ცდილობს, რომ განახლებული სერვისები შესთავაზოს მომხმარებელს.