საქართველოს ახალგაზრდა იურისტთა ასოციაცია სამართალდამცავ ორგანოებს საინფორმაციო სააგენტო „ინფო 9“-ის ჟურნალისტების მიმართ  განხორციელებული ძალადობის ფაქტების შესწავლისკენ მოუწოდებს.
აღნიშნულთან დაკავშირებით, საიას ქართული მედიის სამართლებრივი დაცვის ცენტრი განცხადებას აქვეყნებს, რომელშიც ნათქვამია, რომ ბოლო პერიოდში გახშირდა ,,ინფო 9“-ს წარმომადგენელთა მიმართ განხორციელებული ძალადობის ფაქტები.
მათივე ცნობით, საჯარო მოხელეები ჟურნალისტებს ფიზიკურ და სიტყვიერ შეურაცხყოფას აყენებენ, რაც ოპერატორების მიერ გადაღებული ვიდეო მასალებით დასტურდება.
„გარდა ამისა, აღსანიშნავია, რომ მთელი კვირის განმავლობაში, ჟურნალისტებს კამერით დაჰყვებიან მათთვის უცნობი პირები, რომლებიც „მედია ჯგუფის“ წარმომადგენლებად აცნობენ თავს, უსვამენ შეკითხვებს პროფესიული საქმიანობისა და პირადი ცხოვრების სფეროდან. ასეთ პირობებში ჟურნალისტებს არ ეძლევათ საშუალება განახორციელონ თავიანთი საქმიანობა“ - აცხადებენ საიაში და აღნიშნავენ, რომ უცნობი პირები ამგვარი ინტენსიური ქმედებებით სცილდებიან გამოხატვის თავისუფლებით მათთვის მინიჭებულ უფლებამოსილების ფარგლებს და სხვის პირად ცხოვრებასა თუ პროფესიულ საქმიანობაში იჭრებიან.
ქართული მედიის სამართლებრივი დაცვის ცენტრი მიიჩნევს, რომ ,,ინფო 9“-ს წარმომადგენლების მიმართ განხორციელებულ ქმედებებში დანაშაულის ნიშნები იკვეთება.
„მოუწოდებთ სამართალდამცავ ორგანოებს შეისწავლონ აღნიშნული ფაქტები და მოახდინონ მათზე სათანადო რეაგირება, რათა ჟურნალისტებს მიეცეთ საშუალება ნორმალურ სამუშაო პირობებში განაგრძონ საქმიანობა“-ნათქვამია განცხადებაში და აღნიშნულია, რომ მედიას დემოკრატიული სახელმწიფოს მშენებლობაში უდიდესი პასუხისმგებლობა ეკისრება და განსაკუთრებულად მნიშვნელოვანია მედიის წარმომადგენლებმა ეთიკური სტანდარტები დაიცვან.